الاوله بسم الله

بعد تقريبا 5 سنين من التفكير ولما بقى سنى 31 سنه قررت ادون
وهادون لانى عايز اغير جو قلت ياواد يا متبهدل تغير جو فين؟
تغير جو فين؟ تروح شرم مثلا؟ تقضى يومين فى اسكندرية؟تزحف زى الهكسوس
على واحد صاحبك مشوفتوش من زمان؟تدورلك على مزة وتتنيل تتورط فيها واهى موته والسلام
وفجاة شيطان الوحده نط من الشاشه على راسى وبخ فى ودنى بالراحه
بدل ماتروح شرم او اسكندرية وانت اصلا مافيش معاك فلوس تغلط او حتى تمرض
او تبرشط على واحد كل ذنبه ان صاحبك فى يوم كان اسود عليه وعليك وترمى عليه بلاك
او تورط نفسك ورطه العمر ووتلبس نفسك فى حيطه مع واحده تركب على قفاك طول العمر
ماتيجى ياواد تدون
تفيت عليه(من شمالى) زى ماعلمتنى امى واتعوذت وقولتله غور بفقرك هيا ناقصاك؟
اقولك اغير جو تقولى دون
قالى بس ماتتعصبش يا معلم واسمعنى للاخر
من غير تف قولتله : ار يابن الكئيبه
قالى انت من زمان كان حلمك تسافر تلف العالم على موتوسيكل ومعاك كاميرا وتلات لغات فى بقك اللى
تستاهل سده ده (زومت عليه) وتشوف الدنيا والناس وتهرب من البؤس اللى هنا ده صح؟
قلتله قصر
قالى اديك اتنيلت قعدت فى المخروبة وممعكش تمن السجاير اللى بتحرقها
ومعندكش شغل وكمان بقيت نفرى وبراوى زى قط البرارى لا حد بيحبك ولا انت طايق حد
حتى المزز اللى عرفتهم كرهوك فى الصنف وكرهتهم صح؟
كلامه بدأ يعجبنى قلتله صح ياعم الفاهم
قالى وهو حاسس انه اتمكن منى(ابن اللئيمه) خلاص يامعلم خش ارمى الكلمتين اللى وجعينك ومضايقينك من الدنيا
كل يوم وشوف يمكن يكون فى حد زى حالاتك يعبر اهلك تقوم انت ترد عليه تبقى فله
واهو ياعم من غير ماتشوفه وش لوش ولا تقعد معاه على قهوه وانت اصلا مبتستحملش بواخة البشر
يمكن ترتاح ولا هاتفضل نكره كالعاده ولا حد يعبرك ويبقى دا بقى بختك فى الدنيا وخلاص
قلتله بكل الغرور اللى مخدتش غيره فى الدنيا
انت عبيط ياعم نكرة مين؟انا ياعم لولا ياعم انى مكبر دماغى لدرجة انى معنتش باقدر اخرجها
من باب الاوده كنت ولعت الدنيا انا بس عايز فترة هدنه مع نفسى
شد عليا لما لقانى بارجع بضهرى وقالى : هدنه مين يا روميل مافيش هدنه مع نفسك بتقعد 5 سنين
دا انت لولا ان انا مزاملك من كان زمانك فكت منك وماشى فى الشارع عامل فيها اشارة مرور
او كنت عملت نفسك مطب على الدائرى ياعم روق هوا انا ماعرفكش؟
داس على الجرح وقالى: انت مش بقالك اسبوعين تلاته بتقرا كل المدونات اللى بتشوفها
وبقالك 3 ايام قاد تبتعت ردود فى كل المدونات وعجبك الموضوع وانشغلت مع الناس
لغايه ما المدونه بتاعت جبهة التهييس قالتلك انك غبى وكلامك غبى فقررت تتمشى افرنجى
ومتنزلش لمستواها
عنيا احمرت من النرفزة وقلتله ايه ياعم مالك انا لو عايز ارد ما انت عارف انا ممكن املا
3 مليون صحفه كل يوم بس انت عارف معادش لينا فيه
قاللى هازئا: صادق يا مولانا خلاص يا سيدى اعملك مدونة ولما حد يشتمك اهو يبقى فى بيتك
وانت اصيل متردش على ضيف واهو برضه تكتب اللى يريحك (ضحك عليا وصحى النعره العربيه الاصيله)
لما صحى الملاك العربى المضياف اللى جوايا اتحمست وعنيا لمعت وافتكرت الخيمه والخيل وعنترة
وامرؤ القيس والمتنبى وهوا واقف فى المعادى عالكورنيش والحصان بياخد دش فى النيل و بيقول
ألخَيْـلُ وَاللّيْـلُ وَالبَيْـداءُ تَعرِفُنـي
وَالسّيفُ وَالرّمحُ والقرْطاسُ وَالقَلَـمُ
انا من نظر الاعمى الى ادبى
واسمعت كلماتى من به صمم
قام خادتنى العزة بالعبط ورفضت اعترف لنفسى انه سخنى وولعت عقب سيجارة قديم
وجبت الجهاز على حجرى وفتحته النت لقط بسرعه فتحت بلوج سبوت والكئيب جنبى
لسه باقول بسم الله الرحمن الرحيم سمعته اهه متكلفه وصوته وهوا بيبعد بيقول (ماكنت كويس)
فرحت من جوايا انه اتأذى رحت بانى مدونه صغيره اتوكلت على الله وخابط التدوينه دى.

10 comments:

Anonymous Friday, March 13, 2009 2:59:00 PM  

بسم الله خير الاسماء

مبروكة عليك يا عم و ارمي اللي بيزن دا في اقرب باسكت واقفل عليه كويس :)

Anonymous Friday, March 13, 2009 3:34:00 PM  

مبروك على المدونة

و بداية خير

بس المشكلة إنهابتاكل وقت
فده لو عندك منه كتير يبقى كويس

الأمر التانى القلق اللى بيصيب بعض المدونين من قلة الرواد

و تلاقيهم كل شوية رايحين جايين على المدونة سواء من الجهاز أو من الموبيل
علشان يعرفوا حد علق عندهم و لا لأ

أخيرً : ردك عند نوارة بيثبت إنك فاهم
بس هيه نوارة ربنا يكرنها هوه ده أسلوبها لما بيبقى فيه أمر مقتنعة بيه
يعنى بتبقى عاملة زى القطر واخده فى وشها
بس الجميل فى الأمر إن مكنش فيه شتيمة من الجهتين لإن فعلاً ديه بتبقى أكتر حاجة منفرة

مبارك مرة تانية .. و معلش حامضى غير معروف
يمكن يجيى يوم و أقرر أتعرف
أنتم السابقون

و السلام عليكم و رحمة الله و بركاته

Anonymous Friday, March 13, 2009 4:00:00 PM  

شكرا ليكم يا باشوات رجاله كنتم ولا ستات
وربنا والواو للقسم نورتم
ان شاء الله بسم الله دايما
وخلى ابن الكئيبه يزن دا حتى مسلى
موضوع ان المدونة بتاكل الوقت
اه اكيد بس عادى بقه احسن من القهوة
وبالنسبه للزوار انا شوية كده ومش هاخد بالى وانسى الموضوع ده واتعامل عادى
اما بالنسبة لنوارة
عادى برضه
بس هوا الواحد بيزعل لما يلاقى حد متسرع فى الغلط وكمان مبيحبش يقول انه غلط
مع انا اقريت فى مجلة المانية ان الغلط غلط والصح صح :D
بس اقولك برضه مافيش حد كامل
اللى متسرع غالبا بيبقى طيب
بس فى حاجه كمان انا كان متهيالى ان الواحد لما يبقى مستخبى ورا شاشة ومحدش شايفه غير ربنا لازم تبقى ردوده اروق من كدا
والاختلاف وارد
وكل واحد ليه رايه
مش عشان احنا مختلفين فى موضوع يبقى فى نقص عند حد فينا
خير
شكرا لذوقكم

Anonymous Friday, March 13, 2009 4:25:00 PM  

عين العقل والله

حلو ومؤثر الاسم اللي اخترته
"الكلمةنور وبعض الكلمات قبور"

ردك هادي و رزين

احسنت

بس انت ليه عامل اشراف علي الردود؟ خايف اسمه ايه دا يطلع من دماغك يعلق ولا ايه :)؟؟

مش كل الناس بتتعامل مع الموضوع علي انها مختفية وراء شاشة

ساعات بتكون حقيقي انت اللي بتتكلم .. مش مصطنع ابدا :)
او علي اقل تقدير بتكون حابب فعلا تكون انت

وفي النهاية من غير معرف لغير معرف .. المهم الكلمة الطيبة اللي بتفضل ولا تزول :)

*البت المشمشية *حلوة بس شقية * Friday, March 13, 2009 5:57:00 PM  

ههههههههههه
منور عالم التدوين وداعا للانونيمس
وعايزين بقه بعد الخمس سنين ترقب دول
نشوف هتكتب ايه

حواء Friday, March 13, 2009 7:39:00 PM  

سلام عليكم
هي الردود في المدونه ديه معموله لغير معرف ولا ايه
مبروووووووووووك

Anonymous Saturday, March 14, 2009 12:24:00 AM  

الله يبارك فيكم جميعا وعقبال عوضكم ان شاء الله :))
والله يا جماعه اى انونيمس مضطهد فى الدنيا والناس فاهماه غلط ينورنا
ممكن نكون كلنا انونيمس لان احنا فى الحقيقه اصلا انونيمس
المهم من غير تعقيد هيا متفرقش انا عن نفسى مش كاتب بياناتى لان بيانات الناس متفرقش معايا
كان اللى بيعلق امين شرطه ولا نيلسون مانديلا
بيعمل سندوتشات كبده ولا صاحب سلنترو
صحفى فى جرنال حائط فى مدرسة او فى الواشنطن بوست
المهم انه بشرى عادى
مبيحبش يحكم على الناس لله فى لله
بالمناسبة الكلمة نور وبعض الكلمات قبور دى جملة من مسرحية الحسين ثائرا لعبدالحمن الشرقاوى
وشكرا ليكم
تانى وتالت ورابع

Anonymous Saturday, March 14, 2009 12:41:00 AM  

بما انها اكيد اتقالت في سياق معين بمعني معين ..


افدنا .. افادكم الله

ليه اتقالت انها قبور بالجمع وبالمفرد نور:) ؟؟!!

دا لو مفيهاش ازعاج بما اني كتبت كذا مرة ..معذرة

Anonymous Saturday, March 14, 2009 2:04:00 AM  

الحسين: اتعرف ما معنى الكلمة...؟
مفتاح الجنة فى كلمة
دخول النار على كلمة
وقضاء الله هو الكلمة
الكلمة لو تعرف حرمة
زاد مذخور
الكلمة نور
وبعض الكلمات قبور
بعض الكلمات قلاع شامخة يعتصم بها النبل البشرى
الكلمة فرقان ما بين نبى وبغى
بالكلمة تنكشف الغمة
اللكمة نور
ودليل تتبعه الامة
عيسى ما كان سور كلمة
اضاء الدنيا بالكلمات وعلمها للصيادين
فساروا يهدون العالم
الكلمة زلزلت الظالم
الكلمة حصن الحرية
ان الكلمة مسئوليه
ان الرجل هو الكلمة
شرف الرجل هو الكلمة
شرف الله هو الكلمة أ.ه
دا المقطع كله وهو محاورة مع الحكم ابن مروان
فى بيت الولاية بالمدينه المنورة وكان فى حضور امير المدينه
وكان الحكم يسال الحسين ان يبايع يزيد بن معاوية بعد وفاة سيدنا معاوية
وكان الحسين رضى الله عنه يرفض
فلما انتهت طرق الاقناع فاض بالحكم وساله ان يخرج كلمة المبايعة ويهنأ بعيشه فى المدينه
فكان المونولوج الوارد سابقا
اما موضوع ليه نور مفرد والقبور جمع
لان نور وقبور هما نعت (وصف يعنى)
والنعت يتبع المنعوت
والمنعوت فى فى الجزء الاول من الجمله هى "الكلمة" لفظة مفردةفزلم الافراد وفى الجزء التانى هى "الكلمات"
فلزم جمع النعت(الوصف)
هذا والله اعلى واعلم

Anonymous Saturday, March 14, 2009 11:01:00 AM  

اشكرك جدا علي استجابتك و توضيحك

الجزء دا كلامه جميل فعلا

الكلمة فعلا هي الفاصلة ما بين الجنة والنار .. قد ترفع صاحبها في جنات النعيم او قد تهوي به في قعر الجحيم ..اللهم احفظنا

اللهم ارزقنا خير الكلام والا ..فارزقنا الصمت عنه ولا تؤاخذنا

جزاك الله خيرا :)

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews