دليلك الذكى للانتحار اللطيف


1- اذا كنت انسان عادى بتفهم ساعات وعقلك بيهنج ساعات اتفرج على اربع حلقات متواصلة لمحمد حسنين هيكل على الجزيرة
2- اذا كنت انسان بتقدر قيمة الوقت ومهتم بالتكنولوجيا ادخل لتشاهد اى فيديو على اليوتيوب وانت متصل عن طريق خط التليفون وانتظر لتدفع الفاتورة اخر الشهر
3- اذا كنت ساداتيا ادخل مدونة جبهة التهييس الشعبيه
4- اذا كنت ناصريا ادخل على مدونة الوعى المصرى (ملحوظة اذا كنت حزب وطنى او تنتمى للعصرالحالى باى شكل فانت مش هتعرف تنتحر وكفاية عليك اللى انت فيه)
5- اذا كنت رقيق المشاعر كل طبقين فول حار الصبح من اى عربية وارمى نفسك جوا اول اتوبيس رايح على شبرا (خط طوالى) –يبدأ العرض اعتبارا من يوم الاثنين
6- اذا كنت من محبى الذهاب للبيت مبكرا اركب ميكروباص اخر فيصل من عبدالمنعم رياض يوم السبت او الجمعه ابتداء من التاسعه مساءا
7- اذا كنت ممن يقدرون قيمة الوقت ولا تهتم بالتكنولوجيا اقضى 5 ساعات على اى مقهى فى وسط البلد الثقافى متصنتا على حوارات جيرانك
8- اذا كنت متعصب فى انتماءك شجع نادى الزمالك او حسام وابراهيم حسن
9- اذا كنت قومى عربى وقضية القدس اهم عندك من ابوك وامك وبنتك القادمة ستسميها غزة وابنك ستسميه حماس اتفرج لتسجيلات التليفزيون المصرى وقت الحرب على غزة
10- اذا كنت من الاخوان المسلمين اتفرج على برنامج عمروعبدالسميع فى التليفزيون المصرى او اضرب صحوبية مع عضو فى حزب التجمع من انصار رفعت السعيد او اقرا كتب رفعت السعيد نفسه
11- اذا كنت رجلا لا تهتم بالسياسة ولا بالادب ولا باى حاجة لاتتعلق باكل العيش احضر اى ندوة فى حزب التجمع او فى اتيليه القاهرة اللى قدامه
12- اذا كنت من هواة الارقام القياسية ومهتم بقدرة البشر على القايم باكثر الاشياء استحالة شاهد محطات التلفزة الاماراتية وارقام دولتهم فى اكبر علم واطول برج واضخم جائزة
13- اذا كنت ممن يحبون الستر ويكرهون كل ماهو مبتذل وفضائحى ادخل على موقع العربية نت
14- اذا كنت لازلت تؤمن بالعرب كشعوب محترمه وممن يفهمون ببطء وتعانى الصداع حين تفهم اقرا تاريخ الصراع العربى الاسرائيلى مفصلا وسوف تتشقق راسك وتسقط قطعا فى فصل النكسة دماغك هتعلى تانى فى حرب 73وسوف تقلى مخك بالبيض مختارا فى طاسة وسخة بعد كامب ديفيد وسوف تعزم الجيران على شوربة مخاصيك فى حرب الكويت وبعدها لن تجد سببا لتعيش فقد فقدت اعز ما تملك
15- اذا كنت سنى المذهب بحق وحقيق وغيور على مذهبك وراجل من ضهر راجل اختر اى ممن بين الاقواس (شيوعى – ناصرى – مثقف من وسط البلد – عم رجب القهوجى)واخبره اننا لا يجب ان نثق فى حسن نصرالله ونسلمله كده من غير تفكير
16- اذا كنت تملك ذرة دم واحساس اتفرج على تغطية الجزيرة لاحد الحروب التالية (حرب غزة – حرب لبنان الاخيرة – حرب العراق)
17- اذا كنت رجل جاد وتقدر مهنة الكتابة والكتاب وتصنف نفسك على انك قارئ جيد اقرا لعمر طاهر – خالد الخميسى – علاء الاسوانى -
18- اذا كنت من سميعة الصدر الاعظم هيفاء وهبى (مع الاعتذار للشيعة) اسمع 5 اغانى لاحمد منيب او بحر ابوجريشة
19- اذا كنت من سميعة منيراو مارسيل خليفة او الماجدة فكل من مصطفى قمر او تامر حسنى او زيزى (حسب سنك)يفى بالغرض
ملحوظة لو كنت بتسمع فيروز خسارة تنتحر
20- اذا كنت انسان حساس وتقدر نعمة الحياة اسمع اغنيتين لهانى شاكر وتحبس وراهم باغنيتين لمصطفى كامل
21- اذا كنت مدخن بتفهم وكييف قديم دخن بوسطن او بلمونت اللى تلاقيه
22- اذا كنت من اللى خلقهم ضيق وبتتنرفز لما يحد يزودها اتفرج على حلقة كاملة منى الشاذلى
23- اذا كنت تحب المذيع خفيف الدم والبرنامج اللطيف اتفرج على معتز الدمرداش
24- اذا كنت من هواة برامج التحليل السياسى وتحب الكلام التقيل اسمع عادل امام وهو بيتكلم فى السياسة كسفير
25- اذا كنت من بتوع التهريج البايخ اخبر كمسرى الاتوبيس المزدحم انك لا تقبل العملات المعدنية
26- لو الطريق بينك وبين صنف امين الشرطة مش عمار وبتكره المخبرين اتفرج على تامر امين
27- لو عندك حساسية من فلوس العرب اللى بيدفعوها عشان يلمعوا نفسهم على قفاك اتفرج على مصطفى بكرى فى قناة الساعة
28- اذا كنت عاطل وتريد الحرية عليك واول مركب طالعة اليونان
ملحوظة اذا كنت قد تقرا هذه التدوينه فهذا معناه انك قد رايت الامريكان يدخلون بغداد وشاهدت صدام وهو يعدم فى صباح العيد الكبير ورايت القذافى وهو يسلم كل منشاته النووية ببلاش بعد ماصرف عليها ملايين لانه شاف صدام بيرقص على الحبل وطبعا شوفت قطار الصعيد والناس مشوية جواه يوم وقفة العيد وشوفت العبارة وهى بتغرق والناس بتغرق فى عز البرد ومؤكد شوفت صخرة الدويقة وطبعا شفت قانا 3 اربع مرات فى حياتك بتكرار كربونى وضرب غزة لوحدها بتاع 15 على الاقل وطبعا سمعت ان الناس قتلت بعضها على جسر الجمرات فى الحج 10 مرات فياصديقى متتعبش نفسك الطرق اللى فاتت دى مش هتقتلك بل بالعكس هتنزع اخر شوية احساس جواك
حلك يامعلم ان تحضن التوربينى حضن بشوق وهو خارج من قليوب
او تعوم فى شط هادى فى اسكندرية وتعدى البراميل 0العلامات يعنى .
عدى نفق العروبة على رجليك وبعدين اجرى فجاة ناحية القصر الجمهورى
او روح جاردن سيتى وحاول تقتحم الشارع اللى قبل السفارة الامريكية
او اقف قدام اى قسم شرطة واشتم المامور بامه
وربنا معاك

8 comments:

Anonymous Thursday, March 26, 2009 8:44:00 AM  

الله يسامحك

امال لو كان دليلك الغبي كان هيبقي جواه ايه !!! بردة الله يسامحك زي العادة

حواء Thursday, March 26, 2009 9:45:00 PM  

اسلوبك لذيذ وافكارك حلوه
بس انا حسه اني قريت لك قبل كده في مدونه تانيه
ولا هي ديه أول مدونه تعملها
ولا إيه ؟؟؟
أنا عن نفسي مش عايزه انتحر
بس اكيد ممكن ناس تنتحر بسببي
هههههههههههههههههه
لو سمحت بقي شيل كلمة التحقق ديه علشان ممله جدا

الكلمة نور Friday, March 27, 2009 12:02:00 AM  

الذكى عشان متاخدش بالك وانت بتنتحر
تعملها وانت بتطرقع صوابعك
عالماشى كدا يعنى
وربنا يسامحنى ويسامحك

الكلمة نور Friday, March 27, 2009 12:06:00 AM  

ولا انا والله يا حوا
ودى اول مدونة اعملهاولو عملت واحده قبل كدا اياك اطفحها بس انتى عارفه كل اللى بيعملوا مدونات وشباب زى بيكتبوا كدا
كله شبه بعضه يعنى
على فكرة انا متابع مدونتك وربنا يعينك على مشاكلك

انا شلت كلمت التحقق بس انا كنت حاطهها عن جهل على فكرة

حواء Saturday, March 28, 2009 11:49:00 AM  

مهو انا عارفه انك مكنتش واخد بالك
اصل انا كمان كنت كده
وفي ناس نبهتني
وانت عارف يقي كما تدين تدان
ولا ايه ؟؟؟




اما بخصوص مشكلتي فدعيلي بزمه وضمير وبعدها قول كمان الحمد الله الذي عافاني مما ابتلي بيه غيري ( اللي هو انا )وفضلني عليه تفضيلا

الكلمة نور Sunday, March 29, 2009 1:07:00 AM  

اييييييييييييييييه

زينـه Monday, May 18, 2009 1:54:00 PM  

اصدر كتاب بهذه الطرق


داهيه من دواهي العرب الحديثه :)

الكلمة نور Monday, May 18, 2009 4:05:00 PM  

شكرا
بس مش لدرجة كتاب

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews