اللهم اجعله حلم

لما تبدا الاسبوع يوم السبت وتلاقى نفسك فجاة بقيت الخميس يبقى انت اكيد مش عايش انت اكيد بتتزحلق
بتتزحلق على مسامير من الصبح بدرى فى الميكروباص لغاية اخر الليل وتنام فى مترو المرواح واقف
وتكمل نومك وانت بتاكل غداك المتاخر ولما تريح على السرير بيبقى معادش فاضل كتير على الصحيان البدرى وتصحى وانت نايم
ولما فى اخر الشهر الاتنين جنيه يفرقوا معاك والسجاير تبقى على الاد والقعاد على القهوة بالتيلة هيبقى نفسك بالتيله
لانك خايف من المفاجات اللى مش معمول حسابها فلوس تقع من جيبك توريطه فى عزومة سلف مش عارف هترده ازاى ضيوف مش عارف هتعمل الواجب معاهم ازاى؟
لما المشى الشوارع الزحمة يكتم على نفسك تتخنق والناس تخبط فيك وانت تخبط فيهم تخرج من شارع زحمه بعد ربع ساعهوانت زى الموبايل اللى بطاريته خلصت معندكش طاقة تهرش فى راسك بالظبط بالظبط شبه ملاية السرير مش عارف اولك من اخرك.
لما كل الناس اللى حواليك يبقوا كلهم محتاجين منك حاجات وانت عارف انك اخر امل ليهم من غير سبب واضح يبقى انت رسمى اتزحلقت
لما تقعد تتعلم كل عمرك وتلاقى كل اللى ضبعت عمرك فيه مش هينفعك انت لازم تتعلم من اول وجديد يبقى انت اتزحلقت ولما هتفكر تتجوز وتلاقى بنت الحلال او متلاقيهاش بس اتورطت فيها وتلاقى ان عيله كامله رميت عليك مسئوليات مالكش فيهاعشان هما فاهمين الرجولة غلط تاكد لهم فهمهم وتقول هو مين اللى فهم صح ؟ّ!
تتورط اكتر تتزحلق اكتر وفى الاخر هتعرف انك فقدت اعز ما تملك واتخوزقت زى سليمان الحلبى بس الحلبى كان شهيدوانت اتخوزقت اونطة لان اللى نصب الخازوق مكانش يقصدك اى حد مكانك كان هليبس الخازوق حتى ده اخدته غلط بس عالاقل طلعت بحاجه من الدنياوالاسئله مش بتخلص والحظ دورات ساعات يجيبلك اجابه وايام يطنش يمر من حيينا هيا ليه المسئوليات مبتخلصشى وامته هيجى دور الحقوق
عملت كل اللى المفروض اعمله اتعلمت وتعبت دخلت المدينه الجامعيه بطلوع الروح وبنص درجه بعد ترم كامل ورفضت ادخل تبع الامن وقالولى شغلتك تتعلم وانت قافل بقك والا تبات على الرصيف سكت وذاكرت وامتحنت اتخرجت ودخلت الجيش مقبلونيش اديت الخدمه العامه.
اتعلمت من اول وجديد تعبت لما لقيت شغل وكمان كرامتى كانت تحت جزمتى واشتغلت ودفعت للحكومة كل اللى طلبته منى ضرايب وعوايد وكهربا وميه وغرامات تاخير عن حاجات مكانش المفروض اعملها جمعوا مننا وانا فى ابتدائى فلوس لسداد ديون مصروهربها البليدى ولكح والشريف والريان ,وغيرهم بره وسرقهم ماهر الجندى والحباك وابوغزالة ويوسف والى وعبدالرحمن وكل حرامية الحكومة ومعاهم اللى سابهم يسرقوا
شجعت المنتخب بكل حماس انضميت للوطنى وانا صغير والوطنى خلانى ازور صورة بطاقة وانا عندى 15 سنه عشان اطلع رحلة علمونى فيها الادب ولما رجعت قطعت الكارنيه
قالولى تدفع ونعينك فى بنك او البترول قلت لا واعمل فى غيرى اللى اتعمل فيا دى تبقى عيبه وميبقلهاش الدنيا طعم بعد كدا لو حسيت انى ظلمت
وقفت فى طابور العيش بمنتهى الاحترام اللى فى الدنيا وقلت دى ظروف العالم كله الدقيق بيشح اشتريت العدس وهوا ب 15 جنيه والدوله بتصرف على الامن المركزىوابراهيم نافع وسمير رجب اكتر من اللى بتصرفه على دعم البنزين.مشيت كل ورقى قانونى قلت لو زورت فى ورقى يبقى الدور على قلبى
ابويا قالى اللى يمشى عدل يحتار عدوه فيه مشيت عدل اعدل من موس الحلاقة وعدوى محتارش فيا والعيب مكانش فى ابويا انا اللى فهمت عدل غلط
دفعت اللى قدرت عليه ومقبتضش اى حاجه
اللهم اجعله حلم وصحينى بسرعه

0 comments:

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews