لماذا اراقب التعليقات؟؟

صديقى المهندس:
تعترض كثيرا على من يحبون الرقابة على التعليقات الواردة لديهم وأنا اولهم
وتسألنى لماذ؟
هل انت مثل رقباء الصحف البائدين ينقحون الاراء؟
يتحكمون فى رأى الاخرين؟
وتقول ايضا:لو كانت المشكلة فى اى تعليق غير لائق فابامكانى مسحه دائما
وعندك حق
ولكن من قال انى اتصنع رقابة التعليقات من اجل هذا
فانا اقل من ان يسبنى احدهم فى مدونتى وقليلون هم من يداومون على زيارتها
وهم اصحاب خلق قويم على ما اظن
وحتى اصحاب الخلق الغير قويم الذين سيمرون مصادفة فابامكانى دائما ان اختبر لسانى السليط واخراج بعض المعلومات "الابيحة" التى تعلمتها منذ نعومة اظافرى فى الشوارع- معهم وهذا اختبار لطيف لقدرتى على الردح
انا احتفظ بالرقابة لامر اخر
هل ترى كم عدادت الزوار التى تقع فى يمين مدونتى؟
هل ترى ذلك الدليل بشع المنظر الذى يقول من اين يأتى الزوار؟
انا احتفظ بهم رغم رداءة منظرهم لنفس السبب
ان جزء غير صغير من نفسى يهتم بمعرفة عدد الزوار,انه ذلك الجزء الصغير فى نفوسنا الذى يقول اننا وسماء وغير تقليدين واننا مهمين ولنا نظرة ثاقبة وان ارائنا تستحق اهتمام العالم
الجزء الذى يجعلنا ننظر فى المرآة
هو نفس الجزء الذى يجلعنى اهتم بعدد المهتمين بقراءة مدونتى
هذا الجزء يجعلنى محب للسيطرة حتى ولو على امر تافه
يجعلنى افتح الداشبورد بكل اهتمام لانظر من علق على تدويناتى
ذلك السطر الصغير المكتوب فيه" هناك عدد من التعليقات تحتاج منى لان اقراءها قبل نشرها" يخاطب هذا السطر غرورى ان هناك من يهتم بما اكتبه
ليس هذا اعتراف بقدر ماهو تفسير لامر اعرفه فى نفسى واستمتع به رغم انك قد تراه تافها
الا اننى بهذا النوع من التفاهة مغرم
وهذه المدونة اخرجت من داخلى شخصا لم اكن اعرف انه يعيش بداخلى
انا اهتم اذا بان اتحكم شكليا فى التعليقات وان ارى هذا السطر المنعش لغرورى الغير مبرر
وليس لاى سبب اخر مهما بدا لك مهما
اكتب هذا فى بوست منفصل وليس داخل الردود لانى ارى ان هذا التفسير يوضح جزءا من شخصيتى التى اخفيها عن الكون
ولانى ان لم اشرح نفسى فى مدونتى فلماذا ادون اذا؟
تقبل خالص شكرى-وخالص شكرى ليس ابن شكرى سرحان

50 comments:

أميرة Friday, July 24, 2009 10:12:00 PM  

واضح ان المهندس له في نفسك شوية معزة بما انك رديت علي سؤاله رد عاجل بدل ما انت معلقنا في كام حاجة وعدت بكتابتها و مكتبتش حتي تاريخه :)

الكلمة نور Friday, July 24, 2009 10:50:00 PM  

حتى تاريخه انا مش عارف اجمع دماغى ومش عارف اكتب حاجة لها معنى
دماغى بالظبط شبه ميدان السيدة عائشة الساعه 2 الظهر يوم صيف
زحمة ودوشة وحوادث وعربيات بتقع من الكوبرى
وميكروباصات
وزعيق مش عارف اسيطر على دماغى ولا على ايامى
من 3 اسابيع وانا بامر بحالة العبط المتفحلة دى
وهو يسؤاله صحى حاجة وطلعها على الوش
وانا فعلا باعز المهندس فهو رجل رقيق الكلمة مهذب الى حد مدهش

أميرة Friday, July 24, 2009 11:09:00 PM  

اعوذ بالله ودا تشبيه دا

فكرتني لما بيكون الكوبري مقفول و المرور من تحت اضطراري .. اعوذ بالله بجد

متعرفش مين جاي منين رايح فين

كويس يعني .. "استمر يا باشمهندس ربنا يجعل علي ايديك الشفا " او السلام لأخونا :)

مقدرش اخالفك في رأيك حتي مع عدم معرفته .. بس الجواب بيبان من عنوانه

ربنا يديم المعروف

المهندس Friday, July 24, 2009 11:30:00 PM  

الصديق / الكلمة نور
اولا شكرا جزيلا علي اهتمامك بالرد علي استفساري .. بهذة السرعة ... وشكرا مرة اخري ..علي ثنائك علي شخصي المتواضع ...والذي اتمني ان اكون اهلا له .
ثانيا : كلنا هذا الرجل ... فلست وحدك الذي تهتم لتعليقات زوار المدونة ... فانا ايضا اول ما تقع عيناي عليه هو عدد التعليقات علي الموضوع ... وكذا عدد زوار المدونة ... وان كان اكثر ما يسعدني ان اري ان هناك من اهتم وعلق علي ما كتبته ... فهو بمثابة حديث اعرف انه اجتذب شخصا يبادلني نفس الرؤي حتي .. لو كانت بصورة معكوسة ... بمعني انه مثلا تستهوية السياسة ...حتي ولو في موقف مضاد لقناعاتي
ثالثا : كما انك لست وحدك الذي غير فيك العمل التدويني ... فانا اصبحت " مدمنا " فعلا علي موقع البلوجر ...واضحي 90% من ابحاري علي النت مخصصا لمطالعة المدونات ... بل انني ورغم بعض الظروف " الملخبطة " كثيرا ما تفاجأني فكرة تدوينة معينة في اوقات غريبة ... انا وفي خضم العمل ... او وانا ذاهب للصلاة ... بل واكثر من ذلك ... حتي وانا في اقصي لحظات الاحباط ...من الممكن ان تفاجأني فكرة تدوينة معينة ... لتقفز في تلافيف الخلايا الرمادية لمخي ... وانشغل في عمل العناصر لها ...وكيفية استهلالها ...وما الذي يجب ان احققه من المعلومات قبل الانخراط في كتابتها
رابعا : انت عليك مخالفة ... وستمنع من دخول المدونة ...مالم تحضر ولي امرك ...في اقرب زيارة لمدونتي المتواضعة ... وذلك بسبب انك لا تعلق علي بعض الموضوعات التي اكتبها هناك ... وفي حال تكرار ذلك ... سيتم توقيع غرامة مالية لا تتجاوز الربع جنية ... او الحبس لمدة يومان بدون انترنت ... او بالعقوبتين معا
خامسا : الاخت " اليس " ايه لزمته " القر " علي علاقتي بالصديق العزيز "..صاحب المدونة ... ما حضرتك اكتر واحدة بتسيبي تعليقات هنا علي المدونة... واحنا " ساكتين " ... علي فكرة ده مش " قر " ...ده حسد بس
سادسا : علي كل الاحوال ...طبعا صاحب الرأي والقرار ... بخصوص التعليقات ...كل ما هناك انني احب ان اراجع ما كتبته بعد ارساله ...مخافة ان اكون اخطأت في الصياغة ... او الاملاء ... لذا فان اخفاء التعليق ...كان يستفزني بعض الشئ ... لكن كما تحب ... فكما قلت انت صاحب القرار هنا

المهندس Friday, July 24, 2009 11:31:00 PM  

شفت ... اهيني نسيت .... بسبب الرقابة علي التعليقات .... شكرا ... والسلام عليكم ... واتمني ان تتقبلوا دعاباتي الصغيرة

الكلمة نور Friday, July 24, 2009 11:35:00 PM  

شرفنى جدا معرفتكما
انتم الاثنين
جدا جدا جدا خالص
والسلام عليكم

أميرة Friday, July 24, 2009 11:46:00 PM  

والله مش بحسد

بس علشان تعرف معزتك بجد

انا في اول تدوينة ليه كنت اول غير معرف يعلق عنده سألته نفس السؤال ونفضلي الصراحة

فقررت من يومها اني مسالش السؤال دا علشان هو حر بيته وهو حر

اما بخصوص كثرت التعليقات هي غالبا صدفة اني بدوشة كتير كده بس مش ببقي قاصدة .. الكلام بيجي كتير كده لوحده

كمان اصل الموضوع بيبقي اقرب لانه فاتح باب للمناقشة فمش هعرف اقوله جزاك الله خيرا و اسكت ساعات ببقي مستفزة اني ارد و كمان بستفزه بردي زيادة وخصوصا لو هو شافها "غواية نصيحة " علي حد تعبيره :)


بردة ربنا يديم المعروف

الكلمة نور Saturday, July 25, 2009 1:36:00 PM  

اليس
وقتها لم اجاوب لانى لم اكن اعرف هذا السبب الوجيه

وربنا يديم المعروف

المهندس Saturday, July 25, 2009 4:34:00 PM  

ويجعله عامر ...دائما ... بحس صاحب المدونة... وحس الزوار الاعزاء .
فقط الاخت " اليس " اخذت تعليقي مأخذ الجد ... وانا كنت اقصد الدعابة فقط.
لم تصططحب ولي امرك ...وتأتي للمدونة حتي الان ... شكل الغرامة هيزيد الي نص جنيه ...مع الحبس بدون انترنت لمدة اربعة ايام.
لماذا الاخت " اليس " لا تشرفني بزيارة مدونتي المتواضعة... هل هناك شئ لا يعجبك في المدونة ... التي سوف تتشرف بزيارتك لها
اه صحيح ... انت ايه حكايتك كل شوية عمال تغير في القالب بتاع المدونة... يا بختك ... شكلك بقيت استاذ في مواضيع القوالب ... وانا مسكين مازلت خائف حتي الان من عمل اي تغيير علي المدونة ...احسن يضيع منها شئ .
شكرا ... ودمتم دائما بخير ... والسلام عليكم

الكلمة نور Saturday, July 25, 2009 5:42:00 PM  

سأقيم فى مدونتك بضعة ايام وارفع الغرامة
من حيث القوالب فأنا فى الاصل مبرمج
وان كنت نسيت الكثير من اصول المهنة فإنى احاول ان اتذكر واذاكر ما فات فى المدونة
من باب تمشية الايد يعنى

والسلام عليكم يدوم المعروف

أميرة Saturday, July 25, 2009 6:10:00 PM  

مين قال اني اخدته مأخذ جد

بس قبل ما حضرتك تعلق كنت افتكرت اني سالته علي الموضوع دا في الاول و مردش عليا

صدفة مش اكتر :)

وبعدين مين قال اني متشرفتش بقراءة موضوعات من مدونتك الكريمة :)

انا بس ساعات بيهرب مني الكلام لو الموضوع جالي في وقت دماغي مشغولة فيه .. بس ان شاء الله بس متزهقش من كتر الكلام بعد شوية وتقول يا ريتني ما قولتلها تتكلم :)


التمبلت اللي قبل دا كان لايق اكتر عليها .. مش عارفة ليه حساها مدونة ليلية اكتر منها صباحية و متسالنيش ازاي .. احساس كده فالصورة كانت لايقة اوي عليها

الكلمة نور Saturday, July 25, 2009 6:13:00 PM  

مقدمة التمبلت اللى فات كانت كبيرة شوية وكانت بتضايقنى
والصورة دى لونها رايق وماشية مع الخط

عادى مش هاسألك لان فى حاجات متتشرحش

أميرة Saturday, July 25, 2009 6:19:00 PM  

والله لسه كنت هكتب اقولك سوري اني اتدخلت في حاجة تخصك

هي بس مشكلتها الوحيدة ان السايد بار كله نزل تحت

ومعاك ان لونها حلو وهادي

ياريت متكونش اتضايقت

الكلمة نور Saturday, July 25, 2009 6:22:00 PM  

لا انتى صاحبة بيت دلوقتى
عادى
دى كمان مش خصوصيات

أميرة Saturday, July 25, 2009 6:25:00 PM  

خلاص باه انا محرجة كفاية :(

متشكرة علي ذوقك

الكلمة نور Saturday, July 25, 2009 6:27:00 PM  

كلى ذوق طبعا
:))

أميرة Saturday, July 25, 2009 6:29:00 PM  

بما ان حضرتك طلعت خبرة كده

متعرفش حاجة تخلي الفيديو يتحمل اسرع من الابلود العادي؟ كان نفسي احمل الفيديو بتاع النشيد بقاله ساعة مش عايز يتحمل بالدي اس ال ولا نفع احمله باليو اس بي مودم :(

الكلمة نور Saturday, July 25, 2009 6:33:00 PM  

لا مش لدرجة اقول غيبا:)
بس اكيد فى مشكلة فى الكونكشن
اقفلى الراوتر بتاع الدى اس ال وافتحيه وجربى كدا
بس دا مش حل اكيد
يعنى بافتى

أميرة Saturday, July 25, 2009 6:37:00 PM  

مش نافع الحل دا

حتي قلت اجي علي نفسي واحمله باليو اس بي ابو فلوس دا :)

قعدت حملت ال10 ميجا وبعد ما خلص عملي ايرور ووصلنا لنفس النتيجة

مفيش نصيب بس كان نفسي ااحطه الكلام بصوت المنشد حلو اوي

كتر خيرك علي الفتوي بس المرة الجاية عايزين حل بيشتغل :)

الكلمة نور Saturday, July 25, 2009 6:40:00 PM  

انتى بتحمليه على البلوجر على طول؟
لو اه انا جربت وبردو مرضاش يشتغل وعمل معايا ايرور وعديتهالوا

جربى تدورى عليه على اليوتيوب وتاخدى لنك

أميرة Saturday, July 25, 2009 6:42:00 PM  

انا نزلته من اليوتيوب و سيفته

وبعدين حملته علي المدونة -تحميل فيديو عادي


ولما منفعش حطيت اللينك في اول الكلام عند كلمة And I know

ليها حل تاني دي؟؟

الكلمة نور Saturday, July 25, 2009 6:44:00 PM  

ادينى ثانية

الكلمة نور Saturday, July 25, 2009 6:47:00 PM  

عندك ايميل؟

أميرة Saturday, July 25, 2009 6:50:00 PM  

وصلت لايه؟

الكلمة نور Saturday, July 25, 2009 6:53:00 PM  

اوك شكلك نعندكيش
بصى
الصفحة اللى مفتوح فيها الفيديو على اليوتيوب
هتلاقى fieled
اسمه
embed
انسخى البيانات اللى جواه
والصفحة اللى بتكتبى البوست فيها
هتلاقى فيها اتنين tab
1st is compose
2nd is Html
افتحى الثانى
والصقى البيانات فيها
ثم انشرى
لو معرفتيش
يبقى نشوف حل تانى

أميرة Saturday, July 25, 2009 7:13:00 PM  

tedata حرنانة علي اليوتيوب مش عايزة تفتحه من اي اكسبلورر :(

لا الويندوز ولا سفاري عايز يفتح اليوتيوب




نفعت

الله يعزك يارب ويبارك فيك .. فرحتني جداااااااا

اخدت وقت علشان بهنج معلش

ربنا يكرمك

الكلمة نور Saturday, July 25, 2009 7:14:00 PM  

u welcome

أميرة Sunday, July 26, 2009 12:46:00 PM  

السلام عليكم ورحمة الله وبركاته

معلش انا تاني

سؤال علي الماشي كده

هي التمبلتس الجاهزة دي مينفعش العب فيها ؟

مفيش ولا واحدة مريحاني كل واحدة فيهم عايزة اغير فيها حاجة .. ينفع دا؟

لو تعرفلها حل يا ريت تتكرم عليا وتقوله

اشكرك علي كل حال

الكلمة نور Sunday, July 26, 2009 2:46:00 PM  

لو عندك فكرة عن xml او html
ممكن تغيرى فى الكود وتظبطى الشكل

أميرة Sunday, July 26, 2009 2:47:00 PM  

بجرب ومش عاجبني حاجة

معلش انا زهقتك

الكلمة نور Sunday, July 26, 2009 2:50:00 PM  

لا عادى والله
لسه مزهقتش
بس مش عارف انتى ممكن تعملى ايه بالظبط وايه ممكن لا
فمش عارف

الكلمة نور Sunday, July 26, 2009 2:52:00 PM  

شوفى الموقع اللى انا جبت منه
التمبلت بتاعى
موجود فى الفوتر تحت

أميرة Sunday, July 26, 2009 2:54:00 PM  

انا شفت يجي الفين تمبليت كتير منهم متكرر وفي منهم حلو
بس اجي احطه الاقي الكلام قرأته متعبه ومش طالبة تعذيب في الناس
او ملاقيش علي الصفحة الايكونز اللي بستعملها يعني التعامل معاها غلس


انا زهقتني

متشكرة علي المساعدة :)

الكلمة نور Sunday, July 26, 2009 2:55:00 PM  

أو اختارى تمبلت واستغنى عن الباسورد بتاعك واليزرنايم وانا اعملهولك
وبعدين ابقى غيرى باس ورك
حل غير عملى
وممكن اشرحلك فى الكومنتات عندك عشان مفتوحة

أميرة Sunday, July 26, 2009 2:56:00 PM  

انا بعرف احطهم

المشكلة اني مش لاقية حاجة مريحاني فيهم

كل اما انزل واحدة الاقيها مضايقاني مش مرتحالهم :)

الكلمة نور Sunday, July 26, 2009 3:01:00 PM  

انتى بتدورى فى التمبلت بتاعت بلوجر ودى اغلبها مستخدم
فى تمبلت مواقع تانية
ومش مستخدمة تقريبا
وشكلها كويس
بس هتاخدى كودها من الموقع وتنسخيه فى التاب بتاع
html
وممكن بعد كدا تغيرى جوا الكود شكل الخط والحاجات
بس بعد ما تحفظى نسخة منه قبل التعديلات عشان
ممكن يضرب منك

أميرة Sunday, July 26, 2009 3:03:00 PM  

باخد ال xml معظهم

المشكلة انه مش عايز يحمل القديم
كنت اخدت منه كوبي من اسبوعين و بحمل فيه بقالي شوية مش عايز

هو يضرب دي يعني يعمل ايه بالظبط ؟
الجهل وحش معلش :)

الكلمة نور Sunday, July 26, 2009 3:05:00 PM  

يعنى تغيرى قوس او شرطة وانتى مش واخدة بالك فميرضاش يتفذ والاكسبلورر ميعرفش ينفذه ويبقى التمبلت باظ

الكلمة نور Sunday, July 26, 2009 3:06:00 PM  

طب كويس واصلى
ولو احتجتى حاجة ابقى قولى

أميرة Sunday, July 26, 2009 3:38:00 PM  

تسلم ربنا يكرمك :)

ويدك طولة البال

الكلمة نور Sunday, July 26, 2009 4:08:00 PM  

امين
شكرا

أميرة Sunday, July 26, 2009 5:24:00 PM  

طيب استشارة فنية كمان بعد اذنك

دلوقتي رسيت علي واحد وبوضب فيه .. بس لونه ابيض خالص و عايزة اكسر اللون قلت الون الخلفية

لما لونها اتلون ال3 اربع الاخراني

يعني الربع الاول اللي فيه النقوش دا فضل ابيض بالرسم اللي فيه و اتلون من وسط الكلام في الباقي :(

دي لو حبيت العب فيها
يبقي اسمها ايه كده ؟ واغيرها ازاي

زمانك بتقول ياريتها ما كانت دخلت هنا من يومها :)

الكلمة نور Sunday, July 26, 2009 5:32:00 PM  

والله يا اليس ابدا
بس مش عارف
انا دخلت عندك عشان اشوف ايه اللى اتلون وايه اللى لا
لقيت كله عادى
المهم
لو قصدك ارصية البوست
فلا فعلا معرفش
وفعلا مش حافظ انا باقرأ واحاول اتذكر
انما غيبا صعب عليا

أميرة Sunday, July 26, 2009 7:02:00 PM  

ما انا شيلتها لقيت شكلها وحش اوي

كتر خيرك والله مش عارفة اشكرك ازاي

كفاية الازعاج اللي عاملاه ليك بقالي مدة

اهو خليها متلصمة ف التملبيت دا لحد ما ااعرف الاقي غيره او اعرف ارجع القديم

بس انا كنت اقصد في html

اسم التلوين بتاع المنطقة دي الاقيه باسم ايه
background حاجة مثلا؟

يعني في العموم مش علي اللي عندي

وبردة اشكرك جدا علي حسن الضيافة و كرمك في احتمالي

المهندس Sunday, July 26, 2009 9:19:00 PM  

ها قلت ايه ... هتشارك ؟ ولا هتشارك ؟ ... اساسا معندكش اختيار ... غصب عنك هتشارك
وبما انك طلعت مبرمج " حبة قر " ... وطلعت دااااايس في مواضيع الكومبيوتر والنت " حبتين لاء 3 قررررر " ... ما تساعدنا ... وتكسب فينا ثواب ... ومساعدة " مدونية انترنتية "... قليلة... تمنع بلاوي كتيرة
صمملنا حاجة حلوة كده من حاجاتك ... بس والنبي بلاش الحاجات اللي بتجيب النوم ...زي اللي حاططها ...علي باب المدونة
منتظر ردودك واقتراحاتك ... واكرر غصب عنك هتشترك ...مفيش فايدة ...متحاولش التهرب ... دا حتي الاخت الفاضلة " أليس "ط هتشارك في " يوم البهجة "ط ... بس علي طريقتها
شكرا ... والسلام عليكم

عمرو Sunday, July 26, 2009 10:13:00 PM  

بأستمتع بأسلوبك فى كتابة الفصحى بلغة سليمة واضحه قويه تخلو من الأخطاء النحويه اللى بتجيب لى جنان رغم أنى غالبا بأكتب بالعاميه ..
تقريبا نفس الأسباب اللى خلتنى أعمل اٍشراف على التعليقات فى مدونتى ..
اضف على ذلك شخص مجنون كان بيرسل لى يوميا ما يزيد عن 300 تعليق كلهم شتائم لم أر لها مثيلا فى حياتى و كأنه قاعد لى ال 24 ساعه يشتم فيا بدون سبب و ده طبعا كان بيضايق الزوار و بيجرح مشاعرهم ..
أحييك و أشكرك و تقبل خالص تحياتى ..

الكلمة نور Monday, July 27, 2009 1:10:00 AM  

اليس
بالله كفى عن الاعتذار عن الازعاج فانه امر مزعج:)
المهم انا دخلت على مدونتك لقيتها اخده لونين فى حالة نادرة
:))
شيلى كل الكود القديم وحطى كود جديد نوفى
لانه واضح ان البوجر اتجنن ومش عاجبه اللى انتى حاطاه او انتى خلطتى قالبين فى بعض

والله من وراء القصد

الكلمة نور Monday, July 27, 2009 1:12:00 AM  

المهندس
الله المستعان
هاشوف هاقدر اعمل ايه وهارد فى مدونتك
بس عشان انا عندى نقص فى البهجة فمش عارف ممكن اقعد على الشط اتفرج وخلاص :))

الكلمة نور Monday, July 27, 2009 1:15:00 AM  

عمرو
اشكرك لاطرائك الجميل
من اجل كلمات كهذه تبتهج الاجزاء المغرورة بداخلنا
شكرا لذوقك

300 تعليق فى اليوم
دا يبقى عايشلك يا بيه
كهرب صفحة التعليقات

أميرة Monday, July 27, 2009 9:16:00 AM  

اصلا اصلا انت جيت متأخر

مشفتش اللي المهندس قال عليه ايس كريم :(

و بعدين اللونين دا مش اختراعي دلوقتي .. هو عامل اوبشن اخلي السايد بار بلون والبودي بلون .. انا مش وش اختراعات من دي

و في اللي قبله صدقني جربت
شيلت كل الاكواد اللي ليها علاقة باللون الابيض و غيرتها

و فليت الكلام كله قلت الاقي حاجة بتقول ان الجزء اللي فوق دا غير قابل للتعديل .. ابدا .. و بردة لما غيرت الالون طلع الجزء دا ابيض زي ما هو و متغيرش

بيتهيالي الوضع الحالي احسن الوحشين


حلوة قعادك علي الشط دي .. فكرة بردة يمكن الواحد يتعدي منهم و يبقي مبتهج :)

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews