بمناسبة مؤتمر الحزب الوطنى الديموقراطى

نحب ان نحيى السادة الجالسين الان فى قاعة المؤتمرات فى مدينة نصر لكى يجهزوا لنا الخابور الجديد الذى يجب ان نلبسه للمرة الالف ونحن نضحك والا كان مصيرنا بين ايدى قاطعى الطريق الذين سيجبروننا وقتها ان نتخبور ووجهنا مملوءة بالابتسام المستمتع

نحييكم يا سادة وننتظر على احر من الجمر خطاب السيد جلالة الملك راعى الحظيرة والسيد الامير ولى العهد خلفه الذى سيسمعنا فيه كل خير ان شاء الله

وربما ونحن ننتظر على احر من الجمر ان تخرج لنا الماكينة قماش- قمشون -قمشمش- فستخرج الماكينة لسانها وسيتمخض الجبل ويلد فأرا صغيرا لطيفا تعلم فى الجامعة الامريكية ثم التحق بعمله فى لندن

ليرجع من الغربة بعد ان افنى زهرة شبابه ليس بالكاسيت الشهير على كتفه ولا بالغساله النصف اتوماتيك ولكن عاد لينتقم بعد ان دعى عليه احد الغلابة وقاله روح ربنا يفرج عليك خلقه

وادينا بنتفرج

ولازالت الماكينة تخرج لنا لسانها وتخبرنا انه جاى جاى فقد تزوج خصيصا لكى يكمل نص دينه ويطلع كل دينا ويصبح نصف رئيس لمدة 6 اعوام ااتى فيها على الاخضر واليابس مثل الجراد فاذا اكتمل هذا العام وبدأنا الجديد فأنه سيصبح رئيسا كامل الدسم وكامل الاوصاف وكامل مصطفى وسمعنى سلام لا جمال مع اليأس ولاخبز فى الفرن

ورغم ان بعض الخبثاء- عماد اديب وطبعا خبثاء أومال خبيث واحد؟- يقولون ان جمال لن يكون رئيسا ولكنه فقط يساعد اباه بحكم ان صحة الوالد بقت على الاد وانه لن يصبح رئيسا

فانا مستعد ان ابصم لهذا الجبل البشرى على كلامه لو احضر لى امارة تصدقه

فحتى عم فتحى نجار التصليحات عندما بدا ابنه ليساعده فى الورشة ففى العام التالى طلب من ابيه بلا مواربة ان يجلس فى البيت او اذا ما اصر على النزول فليجلس بجوار باب المحل يشيش ويلعب دومينو مع الجيران.

هذا ما كان من عم فتحى وابنه اما عم محمد وابنه فقد جلس الرجل يلعب دومينو على قفانا امام باب الورشة واحنا قفانا التهب وبعدين دا بيسرق فى اللعب

مافيش دومينو فيه 8 شيش

ولاكوتشينة فيها 5 ولاد
ومع ذلك احيى السيد عماد اديب تحية فخمة طويلة عريضة
واحيى السادة المؤتمرين فى الحزب وخارجه واى سادة ائتمروا -عشان محدش يزعل-واحب اقولهم ان دم الناس لسه منشفش من على القضيب(القطر يا معلم) وان نظرية تبات نار تصبح رماد هى نظرية يتم التعامل بها فى المقاهى فقط وخصوصا قسم الشيشة ولا يجوز التعامل بها فى ادارة الورش(سامع ياعم فتحى) واحب ابعث تحية خاصة للسيد احمد عز باشا راعى الحديد واحب اسأله سؤال غير مهذب(سياخك طولها كام؟)
أنا: يااه.....بس....... هتتطول متقلقش انت لسه صغير
وبينى وبين نفسى: يارب تفضل عى كدا لان معدناش قادرين
بنموت يارب
واحب احى كل السادة اللى عملوا شعار المؤتمر السانة دى "من اجلك انت" فقد استدعى الاصل الريفى بداخلى ووقفت يومين على كوبرى قصر النيل اقول" أأأأأأأأنىىىىىىىىىىىى" ومثلهم يومين فى عبدالمنعم رياض اللى لو عرف انه مات عشانك انت وابنك كان نزل من مكانه فى الميدان وساق توك توك فى الوراق

وبعد كل هذه التحيات -فى ثوب اللعنات

فانا نعلنها صريحة ومدوية

قفانا وجعنا

ارحمونا

لو عايزينها خدوها

بس سيبونا

عايزين ننام بقى-بصوت عبلة كامل

4 comments:

donya Saturday, October 31, 2009 12:17:00 PM  

صباح الخييييير

هههههههههه
ربنا يجازيك عنا خير الجزاء
بجد ضحكتني علي الصبح وانا اللي كنت قايمه مش طايقه نفسي

ههههههه

وبعدين مكنة الحزب الوطني مش بتطلع قماش ايه رايك بقي


تحياتي

الكلمة نور Saturday, October 31, 2009 12:30:00 PM  

صباح الخيرات

ايوه بتطلع لسانها
روقى مافيش حاجة تستاهل

تحياتى

Unknown Saturday, October 31, 2009 1:47:00 PM  

صباحوه احزاب يا معلم
بوست وش جميل اووووى خصوصاً
الكلمة ديه

ولكن عاد لينتقم بعد ان دعى عليه احد الغلابة وقاله روح ربنا يفرج عليك خلقه
وادينا بنتفرج

و ديه كمان

وسمعنى سلام لا جمال مع اليأس ولاخبز فى الفرن


بلال فضل كتب مرة فى المصرى اليوم عن مصطفى كامل الزعيم الوطنى فقال ايه

http://www.almasry-alyoum.com/article2.aspx?ArticleID=216112

فى ٣٤ عاما هى عدد سنين عمره القصير فشل الزعيم مصطفى كامل وحزبه الوطنى فى إقناع المصريين بأنه لا يأس مع الحياة ولا حياة مع اليأس. وفى ٢٨ عاما هى عدد سنين حكمه الطويل نجح الزعيم حسنى مبارك وحزبه الوطنى فى إقناع المصريين بأن هناك حياة مع اليأس، لدرجة أن بعض من عاش فى عهده أصبح يعتقد أنه لا حياة بغير اليأس
----
اخبار اليوم انهارده 6 ملاحق 128 صفحة بالألوان
اللى يبعت الجرائد كل يوم طبق الملحقين اللى نازلين عشان المؤتمر و دووول فيهم البهاريز كلهم و سابلى اخبار السيارات و انهارده اجازة
:-(
واضح انه خايف على صحتى

المشكلة ان نفس الحركة ديه عملها السنة اللى فاتت
هههههههههههه

الكلمة نور Saturday, October 31, 2009 2:26:00 PM  

قصدك صباحو عذاب

والله بتاع الجرايد رحمك يا معلم
دا انت المفروض تدعيله
مش تزعل منه

عنده حق والله بلال فضل
انا خايف اموت وحسنى لسه الريس

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews