شكر واجب

نشكر كل من تقدم بالمواساة لى فى مصابى الاليم واخص بالشكر -دنيا- زينة-بدراوى واعذر كل من لم يتقدم بالعزاء لى وأقول لنفسى ربما يظن الامر تافه وربما لم يعرف وقائع ذهاب المأسوف على شبابه بلا رجعة
وأحب ان اعرف اصدقائى الافتراضيين ان الريسيفر المنقضى عمره المنقلب الى حجرة اشيائى التالفة(فى الاصل هى حمام صغير ملحق بحجرة نومى لم تسعفه الظروف و لازال فى طور التحول لدوره الاساسى لحمام)كان قد اصابه انطفاء الانوار فجأة
ولما كنت عديم الخبرة فيه فقد لففته لف الخائف عليه من تفاقم مرضه واصطحبته لناجى
وناجى هذا على سبيل التنويه رجل يملك محل لاصلاح الالكترونيات كان يجلنى لالقائى عليه السلام صباح ,مساء- وانى كنت لاظن في هذا الرجل قدرة سحرية على اصلاح الاشياء التى لعب معها الدهر او تردد التيار الكهربائى غير المنتظم بالعمارة لعبته وكان ظنى هذا مبنى على سببين لهما من الوجاهة ما اتركه لتقديركم
السبب الاول انه كتب على باب محله
بسم الله الرحمن الرحيم"ان اريد الا الاصلاح ما استطعت" والسبب الثانى
انه كان يضع تليفزيون ابيض واسود فى فاترينة عرضه يعرض عليه افلام كمبيوترية
وهذا وحق الله امر عجاب
ثم انى لما دخلت محله حاملا الراحل وشرحت له ما كان منه
فقد قام بفتحه ليظهر لى قلبه طيبا نقيا
ثم دقق النظر
وبلهجة الخبير نظر فى وجهى ثم قال: دا فيه مكثف واى سى اتحرقوا يا استاذ ولو عايزه يشتغل اغيرهم وهيتكلفوا خمسين جنيه وتاخده بكره الصبح"
فاخذتنى الفكرة "انا اصلا اشتريت الراحل ب 100 جنيه -لانه صينى متواضع وكانت فكرتى وانا باشتريه انه لو باظ اجيب واحد تانى-لعنت الصين فى نفسى وقلت لاحاول مرة اخرى عله يجعل ثمن الصيانة 20 جنيه فاخرج من الفائزين"
ماكدت انطق وابدأ فى الفصال حتى انهارت اعصاب ناجى فبدأ بالقاء كلمات تشبه اللكمات "ياباشا الموضوع مش مستاهل وبعدين دا صينى مايستاهلش الكلام دا كله وانا لو مكانك ماتعبش نفسى واروح اشترى واحد تانى"
احرجنى منطقه القوى السليم وعدت اسب الصين والراحل ذاته واتمنى من سويداء قلبى ان يلقى به فى قاع جهنم لانه جعل "جعر" مثل هذا الرجل يلقى عليا نصائح من نوعية عطشان؟ طب ماتشرب
خرجت من لدن ناجى اجرجر خيبتى وفى ايديى المجحوم
داهية لا ترجعه.
فقط هذا ما كان من منى ومن ناجى ومن الريسيفر
تقدر تسألنى لو كنت جرئ ومستعجل و اللك الكتير اللى فوق ده مش مهم بالنسبة ليك
استفدت من الموضوع ده ايه
أقولك اللى يشترى صينى يستاهل اللى ناجى يعمله فيه.

6 comments:

donya Tuesday, November 03, 2009 6:01:00 PM  

مساء الخير
كل البوستات دي
وطلع صيني
يعني لو ياباني كنت هتعمل ايه
والا الهيئه العربيه للتصنيع
صحيح همه سموها كده ليه الهيئه العربيه للتصنيع
ماعلينا
خالينا في المرحوم
ونويت تعمل ايه هتدفنه وتفرط فيه و تشتري واحد تاني
والا تصلحه وامرك للي خلقه صيني وخلقك مصري الصينين يضحكوا عليك وعلينا؟؟؟؟؟؟؟؟؟؟؟؟؟؟؟؟؟؟؟؟؟

تحياتي

الكلمة نور Tuesday, November 03, 2009 6:58:00 PM  

اخر حاجة كنت اتوقعها منك
:(
تتطلعى زى ناجى فى الاخر؟!!
الله يسامحك
انا كنت حاسس كدا
انتى ناجى دسك عليا؟ّ!!!
__________________
هى كانت الهيئة العربية للتصنيع لما كان فيه عربية وتصنيع
دلوقتى يادوب بالكتير تلاقة هيئة
ادامك الله بخير

زينـه Tuesday, November 03, 2009 10:18:00 PM  

دعك من هذا الناجي الذي لن ينجو بحماره الذي غلب في الصيني وفلح مع الاسود والابيض ...

اجعل رسيفرك يرقد في سلام بعد ان قضى معك أجمل الليالي ..


هذا شبيه بمصير موبايلي الصيني

يرقد في مثواه الاخير في درجي :(

Unknown Tuesday, November 03, 2009 10:32:00 PM  

هههههه
ههههه
ههه هاى هاى

حبيبى حبيبى حبيبى
بضحك ضحك على ناجى و تصرفه معاك
بيقولك صينى و لا تغدينى
و يدوبك الهيئة بقت كشف هيئة

سؤال محرج هو ايه علاقة الحمام بالموضوع

ههههه

الكلمة نور Tuesday, November 03, 2009 11:58:00 PM  

زينة
يرقد مع الابرار الذين سبقوه
ثمة كروت شاشة وكروت فاكس
وبقايا غزوة تجهيز الشقة
++++++++++++++++
بمناسبة موبايلك الصينى اللى فى الدرج
انا بيصعب عليا الحاجتا بتاعتى اللى باظت ارميها فى الزبالة
:))

الكلمة نور Wednesday, November 04, 2009 12:00:00 AM  

بدراوى
انا عايش على امل انى اجيب فى حمام الاودة جاكوزى
متستقلش بيه يا بدراوى
___
عامل فيها مهندس الجعر
يللا كل هيئة وانت طيب

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews