غور فى 60 داهية



جلس السيد هيكل فى حلقته الثالثة والثلاثين الف بعد المليون مساء الجمعة الماضى من برنامجه السرمدى "مع هيكل - تجربة حياة" ليخبطنا الحقيقة عارية ملط بلبوصة كما انزلقت من رحم امها

وقال لافض فوه ودفن بأسنانه بخصوص الحديث عن عمليات المخابرات المصرية اجمالا

متصدقوش أوى قصص المخابرات اللى بتشفوها فى التليفزيون فهى فى اغلبها مليئة بالمبالغات وقال مش عايز اذكر اسماء بالنص والقصص اللى اتعملت

ثم اتحفنا بالعملية الوحيدة التى يقدرها ويظنها من انجح واقوى العمليات وهى عملية زرع ميكروفونات فى مقر السفارة الامريكية فى القاهرة فى معرض ذكره العملية التى قبض فيها على مصطفى أمين بتهمة التخابر مع امريكا

فى نظره هذه العملية تساوى انجح عمليات التجسس التى قامت بها مخابرات الحلفاء فى الحرب العالمية الثانية وتم فيها اختراق شفرة مراسلات القيادة الالمانية


يوثق السيد هيكل دائما كلامه بوثائق اصليةليست مصورة ويحتفظ بها فى بيته فى لندن من الخمسينات

الالاف الوثائق السرية بحوزة السيد هيكل ورغم ذلك لم يلقى من نافذة مبنى انجليزى ما

ربما يملك بدروم؟

غير مهم

فمنتحرى الشرفات فى لندن من المصريين يوقعون وثيقة قبل الخروج من مصر يقولون فيها انهم سينتحرون من الشرفة اذا احسوا بدنو الاجل

ورغم ذلك فممدوح اسماعيل الذى اغرق الف مصرى فى نصف ليلة لازال يسعى فى لندن بمنتهى الاريحية هو والسادة لصوص القروض وذلك لانهم لم يخرجوا بطريقة شرعية فلم يوقعوا الوثيقة ومن وقع منهم فقد اجرى عملية زرع اجنحة لكى يفاجئ قدره اذا قذفه من شرفة ما


ماعلينا هى الكلمة المناسبة التى اود ان اخرج بها تداعى الاحداث لرأسى

اود فقط واتمنى على السيد -المحلق للابد- هيكل

وهو اعلم منى بالاصول

انه اذا تذكرنا ميت وذهبنا لنزور قبره فليس هناك داعى لخلع الملابس والتبول على قبره بحجة ان القبر شبه الخرابة خصوصا لو كنا احنا اللى بنينا القبر بايدينا

وكنت لغاية وقت قريب بتعمل مولد سنوى ترقص فيه رقصة المجنونة حوالين المقام اللى بقى خرابة

وعايز اقولك ان المشرحة مش ناقصة قتلى

وان انا لغاية اللحظة اللى احنا فيها دى كل مابشوف نبيل الحلفاوى بابقى عايز أبوس ايديه واساله عن "محسن بيه ممتاز" باحساس طفولى مشفوع بمشاعر وطنية ساذجة

فبلاش تشوه مشاعرى الوطنية الساذجة

عشان انت قررت فجأة ان جهاز المخابرات و صلاح نصر مش عاجبينك واشتبكت مع ابنه من 3 شهور تقريبا

أقولك غور فى 60 داهية قرفنا بقى

6 comments:

Unknown Thursday, December 17, 2009 4:48:00 AM  

ههههههههههههه
براحة يا عمنا
لحسن حتتشتم ازاى تهاجم اسيادك هيكل
هههههه
طبعاً ده مش كلامى ده كلام بعض الناصريين

بص هيكل بيتكلم فى احداث كل الشهود اللى عليها ماتوا

يدينا طولة العمر
:-)

الكلمة نور Thursday, December 17, 2009 12:47:00 PM  

هو احنا الناس الظلمة عندنا مبيموتوش ليه؟
اكيد ربنا غضبان علينا

donya Thursday, December 17, 2009 4:31:00 PM  

مساء الخير
مش فهمه هو هيكل ليه ناصري
ده اللي يدقق في كلامه صح الصح هيلاقيه ماسبش شخصيه من زمن عبد الناصر وقال عليها كلام زي الزفت
ده معناه ان عبد الناصر كان محاط يابارجوزات ياحرميه يانصابين ياهبل ياخونه
طيب اي رجل هذا عبدالناصر اللي نايم علي ودانه وحوليه شلت مجانين سلطه
حتي جهاز المخابرات بتاع عبد الناصر طلع عبيط
كمااااان
طيب حد عاقل يقول لي ده ناااااصري ازاي

كمان السيد هيكل
جاب منين كل الوثائق التاريخيه دي ان شاء الله

يااما سرقها يامزوره يامخاوي جني بيجيب له كل وثيقه هو عايزها من خزن امن الدوله والمخابرات والجيش والوزارات المختلفه
لا بجد هيكل والجني بتاعه بيتعبوا خاااالص

وعايزه اقول هو عزرائيل غايب عنه ليه

تحياتي

الكلمة نور Thursday, December 17, 2009 5:18:00 PM  

دنيا
يدعى السيد هيكل ان ولائه كان دائما لمهنته كصحفى وان وازعه دائما كان ضمير الصحفى الباحث هن الحقيقة
وهو فى ذلك كاذب كبير
فقد قام بدور الشيطان الاخرس لمدة عشرين عاما او يزيد
ناصحا بالاثم ومستمعا له بكل ما اوتى من صمت وحفظ وتدوين للزمن الذى قدر انه اتيا لا محالة
وقد اتى الزمن وطرد شر طردة من كنف عائله والعائل هنا هى قصور صنع القرار وليس شخص بعينه
وها قد اتى زمن اصبح فيه مرة اخرى كبير الكهنة ولكن بصفته كاهن متفرغ
يملك من الوثائق ما يكفل له هذه الصفة كمحتكر اوحد للتاريخ السرى لامة هذا من جهة ومن اخرى فكل من يعيش فى اروقة السلطة الان لانهم كانوا قططا صغيرة يربيها النظام وقت ان كان هو كلب كبير يرعى حدود القطيع
فانه يعلم عنهم باوراق موثقة كل ما يجعله دائما فى موقف قوة
للاسف
اما بالنسبة لعزرائيل فهو امر الله لا راد لقضائه الا رحمته
اللهم ارحمنا
تحياتى

sara rabie Sunday, December 27, 2009 5:12:00 PM  

ده هيكل يا جدعان

هيييييييييكل

!!!!!!

الكلمة نور Monday, December 28, 2009 8:59:00 AM  

سارة
دا توكيد ولا تعجب
حاسس انك كنت بتكتبيها وانتى بتزعقى ليت الكتابة لها صوت
تحياتى

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews