أول تنزانى

ظهر عندى فى ذلك العداد الدوار المأفون المرتكن الى يمين الصفحة وانت داخل علم جمهورية تنزانيا وانا لم يخطر فى خيالى ان يمر رجل تنزانى من هنا ولو من باب مرور الخاطئ الغير مهتم وربما الغير فاهم ما هو مكتوب
ولما كنت فى مزاج مواتى للهيصة فقد اتخذتها ذريعة للاحتفال بمرور اول تنزانى من هنا اثباتا لوجهة نظرى ان مشكلة الحشيش مشكلة عالمية وليست مصرية محضة واحب ان اعرف صديقنا التنزانى ان المشاكل المصرية المحضة مشاكل بالغة الخصوصية كما يؤكد الرئيس فى كل حوار
فزيادة عدد السكان مشكلة مصرية
ومشكلة التعليم مشكلة مصرية ذات خصوصية كما يؤكد كل وزير وهى ناتجة عن زيادة السكان
مما ادى بوزارة الرى ان تلوث المياه مما يخف من اعداد السكان وتلوث المياه مشكلة مصرية ايضا
ولما كنا فى المياه فان هذه الايام هى موسم البكاء على اننا اصبحنا على شفا الجفاف وستصبح مصر هبة عصير القصب بدل من هبة النيل وقد افتى متخصصى الدولة ومستشاريها انها ناتجة من خصوصية وضع مصر واننا كشعب ابن كلب قذر لا نستخدم المياه استخدام رشيد رغم ان رشيد نفسه من لاعبى الجولف العظام فى مصر ونحن نعلم ان ملاعب الجولف تستهلك اكثر من استهلاك حى بولاق الذى يفوق تعداده سكان اسرائيل والكويت معا
ولاننا نحتاج لدروس فى كيفية استخدام المياه التى تصل متقطعة للادوار العليا فى منطقتنا رغم اننا على وش الدنيا فاننى ساتبرع بجسدى كمنحة لا ترد للحكومة لكى يعلموا عليه الشعب كيفية الحموم الرشيد فى التليفزيون واهو منها ابقى استحميت ومنها الشعب يتعلم
واعلم ان الحكومة ستشتكى من طولى وعرضى وسمكى وكرشى الضخم متذرعين ان هذا سيهلك كما اكبر من الماء لذلك سيفاجئنا السيد النظيف احمد نظيف بمنع الحموم لمن يتجاوز طولهم ال 180 سم ووزنهم 110 كجم ولا عزاء للمصابين بخلل هرمونى ويمنعهم الفقر من العلاج- يبقى لا علاج ولا نضافة - لان مشكلة وزارة الصحة المصرية مشكلة ذات خصوصية فقد حاولت الغاء العلاج على حساب الدولة وستجعله على خساب صاخب المخل وكما نعلم فالمحل يدعى دار الفؤاد ويقع فى السادس من اكتوبر التى تحولت من تاريخ للنصر الى منتجع للمرفهين وعلى طرفها منفى للمعذبين والهاربين من جحيم القاهرة الى جحيم تحت الماء
وهذا يعود بنا للماء
فانا اود ان اسال صديقى التنزانى بما انكم من دول حوض النيل
انتوا عندكم نقص مية ولا حشيش؟؟؟؟؟؟

7 comments:

فاتيما Tuesday, March 30, 2010 3:08:00 PM  

يا خرااااشى يا نور

ايه داااااااا


انا تهت خالص

مين ليه و ازاى ؟؟


بقى حد
داخل غلط
يثير كل هذه الأشجان
و يقلب عليك و علينا
المواجع بالمنظر دهوه

منه لله


معلش معلش



أمشى يا تنزانيا
امشى يا تنزانيا

خلاص هوه هيشرب اللبن
و ينام خلاص


هههههه



اسعد الله كل ايامك
يا مالك الاجنحة

عايشه لنفسي Tuesday, March 30, 2010 4:00:00 PM  

لابجد انتى تجننى
ايه يابنتى الكلام ده
انا دخل عندى اسرائيلي مرةفي بدايه مدونتى تحبى اسالهولك علي حاجه
بجد تسلم ايدك

عايشه لنفسي Tuesday, March 30, 2010 4:37:00 PM  

ههههههههههههههههههه
الله يسلمك
بس لازم ندبح حاجه فرختين يمشوا؟؟
تسلم ايدك موضوعك يجنن كالعاده

الكلمة نور Tuesday, March 30, 2010 5:37:00 PM  

فاتيما
دا انا كنت باحتفل
بذمتك مش مناسبة تستاهل
؟

الكلمة نور Tuesday, March 30, 2010 5:42:00 PM  

عايشة لنفسى
انا واحد يا ست الكل
وبعدين هو كل يوم الواحد يعدى عليه تنزانى دا انا ادبحله عيل من العيال مش فرخين
شكرا للاطراء

mezo Tuesday, March 30, 2010 6:01:00 PM  

ثواني ثواني. انا مش تنزاني انا مصري بس جاي تنزانيا مشروع 3 شهور بس وراجع تاني عشان كدة الكاونتر اداكي تنزانيا
وانا وصلت هنا عن طريق مجمع التدوين المصري مش بالغلط يعني متخافيش الدار امان
وبالنسبة لسؤالك للاسف مفيش حشيش في تنزانيا والمية هنا تقرف

الكلمة نور Tuesday, March 30, 2010 11:38:00 PM  

ماشى يا عم ميزد ترجع بالسلامة ان شاء الله
نورت والله
بس انا راجل مش بنية يا معلم
نورت تانى

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews