اعرف عيب المكنة من دخنة شكمان

فاكرة انها تفرق؟
...تبقى عبيطة
دا انا ساكن فى الجيزة
فى قلب الزيطة
لو عارفه الجيزة
تبقى الحسبة بسيطة
بنخطى على الحيط
لاجل نفوت
فى ميدان الشوك
وننط حواجز
ونرقص شرطة وشعب
علشان كرسى فى مشروع
ناخده ونتمترس فيه
وندفع جندى سليم
ونحارب علشان الربع
الفضة المخروم
مين أدى
باشحن بالخمسة
واضرب فول متروء
بالحار عالصبح
واتعشى الصبر
عيب يا عبيطة
دا انا دارس صمت
فى مدرسة الصم
واهرش وأطنش
واعرف عيب المكنة
من دخنة شكمان

6 comments:

فاتيما Sunday, May 02, 2010 10:16:00 AM  

ليه بسسسسس كدا
يا نور ع الصبح
!!!!!!!

يعنى غلطة البونية
انها على نياتها
و انتا خلتها من كتر الطمأنينة
تتصور انها تفرق؟!!


يا خرابى ع الرجالة
و قسوتهم
و غرورهم
و تطويحهم للحب
على طول دراعهم
لما يبقوا ناويين

عموما
بغض النظر
عن التفاصيل
انا متعاطشفة
قلباً و قالبا
مع البونية دى
اكمنها من بقية جنسى
و اصل انا عارفة الاحساس دا
لما ينتاب البنى آدمة
قد ايه بيكون جميل
انها تحس انها تفرق عند حد

و لو بالكدب


غالبا هيا عارفة انها
مش هتفرق
بس بتقاوح
عشان بريستيجها
و عشان زى فيروز ما بتقول
عندى امل فيك


ربنا يتولااااااااااها
برحمته بقى و يكون ف عونها



طبعا الكلام اللى فوق دا
كله
لو كنت بتتكلم عن سخص ما


اما لو كنت بتتكلم ع الدنيا
بشكل عام


فيؤسفنى اقولك انه
اختك فاتيما مرت بهذه الحالة
مرارا و تكرارا
و قررت تعمل زيك كدا كتيييير
فإكتشفت شىء مرعب
المه اصعب من الالم العادى


انك لما بتحاول تعيش على هامش الدنيا من كتر زهقك ..
هيا كمان بتخليك ع الهامش
و بتفقد متعة التواصل
مع أى شىء و اى مخلوق
و دى قمة الالم يا نور



عار على الجيزة
انها تصدرلك الاحساس السخيف دا
اومال انا لما كنت ساكنة قريب من هناك من عشرين سنة
و بعدى ع الميدان دا
كل يوم مكنتش بحس بكدا ليه؟!!!


غالبا المشكلة
ف التوقيت بتاعى انا
دول عشرين سنة
بحالللللهم يعنى عمر فوق العمر

يلا
م الآخر
صباحك خير يا دارس الصمت
و تملك أجنحة

الكلمة نور Sunday, May 02, 2010 10:55:00 AM  

صباح الفل يا فاتيما
مالها الدنيا؟
دى زى الفل
انما بعض البنيات بيفتكروا ان قلبهم جامد
ميعرفوش ان جمودية القلب صنعة رجالى
المهم ماعلينا
عشرين سنة ايه بس انتى هتكبرى نفسك والعرسان كدا هيهربوا
خللى بالك
احترسى
مرة تانية صباحك زى الفل

Anonymous Sunday, May 02, 2010 12:22:00 PM  

دا انا دارس صمت
فى مدرسة الصم
واهرش وأطنش

عجبانى مووووووووووووت
بجد حلوه الفكره جدا
والكلمات منتقاه لتعبر بجد من لغتنا اليوميه

تحياتى

الكلمة نور Sunday, May 02, 2010 12:35:00 PM  

اشكرك يا محترم
خالص تحياتى لك

فاتيما Sunday, May 02, 2010 1:05:00 PM  

انا قولت برضو يا خرااااابى ع الرجالة

طيب

سيبنالكم جمودية القلب
الحمدلله على الضعف و اللين اللى عندنا
اهو أرحم شوية
رغم تبعاته

و ايوه انا كبيرة
من عشرين سنة
يعنى 1990 كنت سيادتك فى اولى جامعة
يعنى شرخ الشباب كدا
و بقول يا هادى
و كنت بروج الجامعة كل يوم سالكة هذوها الطريق الهرم الجامعة و العكس

و عرسان ايه اللى هخلى بال منهم
مفيش أصلا

و لو فيه
يسعدنى أطفشهم
و يا حبذا
ميجوش من اصله
فمتقلقش من الناحية دى خالص


و براحة ع البونية شوية
غالبا اللى بيرسم الكبرياء دا
بيكون شخص فى منتهى الغلب
بس بيعمل ساتر يستخبى وراه
لعل أحدا لا يكشفه
و يعتبرها نقطة ضعف يدخله منها
لأنها اكيد زماااان
كانت دى الثغرة
اللى سببتله هزايم جمة
و لا تنسى



فبراحة يا نور
خليك انتا الكبير

سلاااااااام
و كفاية كدا
لحسن رغيت كتير
و دوشتك مالك الأجنحة

الكلمة نور Sunday, May 02, 2010 1:48:00 PM  

البعض عنده كبرياء مفهوم زى اللى انتى شرحتيه
والبعض عنده سذاجة مختلطة بفظافة تشبه الكبرياء
دا من ناحية
والناحية التانية
الموضوع مش زى ما انتى متخيلة بس بردوا انا الكبير
**********
حلوة شرخ الشباب دى
ايامها كنت انا فى ميعة الصبا
***********
لا دوشة ولا حاجة
يزيدنى شرف تعليقاتك

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews