من ده كتير

ياليله طين فجأة بقى عندى 31 سنه وفار العمر من الكسرولة لما نسيته على النار
لما كنت فى ثانوى كنت بابص على اى حد عنده 30 ومعملش حاجه واسال نفسى طب هوا عيش ليه
المشكلة انى اكتشفت انى بقيت زيهم فى يوم الصبح بدرى
وانا مش انسان اللى من نوعية اول ما اصحى يبقى اشتغلت
لا انا بافضل مهنج لمدة ساعتين تقريبا
وبعدها ابدأ استوعب اللى بيحصل حوليا واللى بيتقالى وافهم ويمكن اضحك بعد 3 ساعات
فى الاول بعد صباح الفل يا دنيا والمية الساقعه
انزل اضرب طبق فول وش القدرة على العربية اى عربية
للحق طبق الفول ده بيزود التهنيجة وعدم الفهم وابدأ اتمشى عالهادى
لغاية القهوة والمسافة من العربية للقهوة بتبقى اصعب 30 متر فى اليوم
اطلب شاى بحليب افرقعه مع سيجارة لانى مش باشيش
اول نفس من السيجارة بيخلينى اكح
الكحة بتخلى صدرى يطلع صوت زى صوت العربية لما تحاول تدورها الصبح
الكحة بتخلى الكونتاك يشتغل تبدأ عنيا تفتح وودانى تسمع وعقلى يستوعب
لما الشاى بحليب يخلص تكون القهوة المظبوط الدوبل وصلت
اولع للقهوجى سيجارة تحية صحيان
مع اول شفطة من القهوة المرارة ترعش جسمى من جوا وانتعش
ابدأ احس بالدنيا حر ولابرد واعرف اذا كان الفول بتاع النهاردة حلو ولا القدرة اتسلقت
وابص بعنيه على بتاع الجرايد واركز مع راديوالقهوة
فى اليوم ده فتحت عينيه فجأة كانى مكنتش نايم وصاحى بالعافية عينيه بتبحلق فى الفراغ
ودماغى صافية زى ما اكون صاحى من بدرى
اتقلبت على ضهرى كما العادة قبل ما اقوم
بصيت فى السقف لقيت ابن الكئيبه قاعد عالمروحة ومدلدل رجليه
عرفت انا صحيت فايق ازاى
قالى صح النوم يا معلم حد يبقى كسلان كده يوم عيد ميلاده
قلبت شمال ومرديتش عليه بس من جوايا عرفت انه هيبقى يوم اسود
وان انا مش عايز اقوم من السرير
مسابنيش لما اتقلبت لقيته قاعد على الراديو الصغير اللى جنبى
وبيضحك ومبيتكلمش
قولت جوايا مش هايسبنى فى حالى
مديت ايد على الكرسى شديت الفوطة ونزلت رجليا وقعدت على طرف السرير جمعت
نفسى ورحت قايم
لبست شبشبى من باب الحمام دخلت فتحت الميه لقيته قاعد على رف المرايه
صوته كان خايف وهوا بيسالنى :انت زعلان منى؟.
طنشته وغسلت وشى وعملت كل الواجبات واتنشفت ونشرت الفوطة ودخلت الاودة
لقيته ممدد على السرير وبيقولى مالك ساكت ليه؟ هتعمل ايه النهاردة
قلت اديله الوش الخشب عشان يخاف ويتكسف ويهرب
صرخت فيه : وانت مال امك
اتكسف كتم النفس
غيرت هدومى لبست اللى لقيته فى وشى
نزلت من الشقه خبطت الباب ورايا
كنت متنرفز ودماغى برضه مجمعه مجاليش نفس افطر
ولا اشرب حاجه ولعت سيجارة
اكتر حاجه باكرهها السيجارة من غير فطار
هوا الصبح البارد خبطنى فى وشى ارنبة مناخيرى بردت
حسيت انى عايز اتمشى والشوارع فاضية
كنت بافكر فى عيد ميلادى فاتكرت ان السنه اللى فاتت كنت فى وضع اسوء من كده شوية
ارتحت شوية و حسيت ان المشى هيجرى الدم فى جسمى شوية واصحصح
انتشيت لما لقيت الدنيا فاضية وزى ماتكون مغسولة قلت لنفسى صباخ الفل ياواد
كل سنه وانت طيب ورب ضارة نافعة
دلعت نفسى بحته تونكيز وعلبة سجاير ميريت اصفر وقلت فى بالى مش اقل منها فى عيد ميلادك يا برنس
فرمت التونكيز وفكيت العلبه وطلعت سيجارة عجبتنى السيجارة والتبغ متوزع جواها بنظام ونعومة وشكلها النضيف ولعتها ومشيت ادندن والموسيقى طالعة من جوا دماغى. شوية عبدالوهاب فريد
كدا يعنى الدندنه جوايا.
رحت الشغل قعدت على مكتبى لما التليفون رن بصيت على الرقم عرفت انه صاحب الشركة الدندنه قطعت من دماغى قلت جوايا يا فتاح يا عليم يا رزاق يا كريم
انا :صباح الخير يا ا فلان
هو:صباح النور يا سيدى
هو برضه :ايه اللى حصل مع ا فلان امبارح اتصل بيا الصبح والراجل زعلان وهددنى انه هيجمد شغلنا عنده
انا ببرود : محولتوش عليا ليه يا باشا
هو بعصبيه: ليه هو انا مش صاحب الشركة دى برضه ولا انا صورة
انا : لا ازاى يا استاذنا دا انت اللى علمتنا الشغل
بس انا جيت الشغل على اتفاق ان انا اللى مسئول عن الفرع ده وكل تعاملاته وكل اللى حصل مع ا فلان امبارح
كان خلاف لانه عايز ياكل علينا نسبتنا ويبيتها عنده للصيف الجاى وبطريقة لوى الدراع .
هو: تقوم تشتمه وتشرشحله
انا بنرفزة وفراغ صبر : فى ناس مبتجيش غير بالعين الحمرا وبعدين لو استمرينا معاه هيخسرنا ومش هنقدر نتكلم معاه وفى الاخر انا باتحاسب كل ست شهور على نتيجة الاعمال بارقام
هو: انت هتبيع وتشترى فيا يقه
انا وبقيت مش شايف قدامى : لا ابيع ولا اشترى البضاعه متساويش
ا فلان المسئول ورايا قاعد بره وهوا عارف الشغل جاى منين ورايح فين انا ماشى وانا هاجيلك بكره نصفى حسابنا قفلت التليفون
قمت خرجت وقلت للمسئول ورايا اتصل بمدير الشركة
انا ماشى
نزلت ولعت سيجارة تانيه وعفاريت الدنيا بتتنطط قدام عيينيه
فكرت: انت اتسرعت ياعم
لا اتسرعت ولا حاجه الشغل لو ماخدتش فيه موقف اللى رايح واللى جاى هيلطشك ويعمل مش وخد باله
قعدت على قهوة طلبت كباية شاى شربتها وانا باتفرج على الناس اللى رايحه وجايه
وانا من زمان الفرجه على الناس هواية عندى
دماغى انشغلت فى اللى معايا فى جيبى افتركت ان بعد الميريت الاصفر والتونكيز وحساب القهوة يفضل فى جيبى 40 جنيه
قلبى اتقبض لما فكرت ان ممكن بكره ميبقاش معايا فلوس اكل وادخن افتركت الشكرة وانى لسه مسيبتش الشغل نهائى كرامتى نأحت عليا اوى
للحظه حسيت ان الوقت بيجرى بسرعه وانى متاخر عن كل الناس اللى بدات معايا اللى اتجوز وخلف
واللى بره وحلف ماهو راجع
راجعت كل اصحابى لقيت انى الوحيد اللى متجوزتش لسه وكمان مافيش رصيد فى البنك ولا حتى بمية جنيه اعصابى بدات تنشد زى وتر العود ودمى بدأ يفور قمت من القهوة ركبت وروحت لقيت البواب بيقولى يا ا فلان
كهربة السلام والاسانسير واجر الحارس اللى هوا هوا يعنى(100 جنيه)بصتله من فوق لتحت وقات فى بالى وانت ذنبك ايه اضربك وانت زى حالاتى
قلتله طيب
ركبت الاسانسير طلعت
فتحت الشقه لقيته قاعد على التلاجه بيهز رجليه وبيضحك