ستة ابريل 2010 ان شاء الله

تصبحوا على خير وعافية وكلام من لسان مش مربوط ولما نتقابل تانى هنرمى على بعض الصباح ونخرج بعض من سكوت مكروه كراهة التحريم

وننسى سته ابريل 2009 ونستنى اقرب سته ابريل جديد فى 2010 او حتى يجى فى اكتوبر اللى جاى مش هتفرق كتير انا معرفش شباب سته ابريل ولا واحد منهم وشرف ليا انى اعرفهم و باحبهم والله وابريل نفسه يتشرف بيهم

وعارف انهم واخدين على خاطرهم من سته ابريل 2009 بس متزعلزش زعلكم يزعلنا والله حتى لو فى منكم خافوا ينزلوا من البيوت مش مهم كلنا بنخاف والخوف بيشل التفكيربيربط اللسان محدش نزل عشان تانبوا نفسكم على انكم منزلتوش مش مهم

ابريل الجاى هو المهم مش هتبقوا لوحدكم الناس هى اللى هتنزلكم من البيوت هما اللى هيحموكم وهيقتلوا جواكم الخوف .

من سبعة الاف سنه عدى علينا سبعة الاف ابريل كل ابريل يشبه ابريل بس لما جيتم معادش ابريل هوا نفسه زاد على شم النسيم كمان شم نسيم والله ربيع كمان

مانتوش مصدقين والله حقيقى انتم عملتم عيد جديد للربيع عيد فتح الفم وتحريك اللسان عيد للاحلام

ننام يوم خمسة ابريل واحنا بنحلم ان بكره يوم جديد قبلكم مكانش فيه سهرة للحرية يوم خمسة ابريل قبلكم كان ابريل فيه تحرير سينا دلوقتى فيه عيد تحرير الحلم

محدش فيهم يعرفنى ويمكن حتى ميقروش كلامى بس لو حد يعرفهم وقرا كلامى يبلغهم انكم ارجل من مليون راجل حتى لو خايفين وانكم حتى لو غلطتوا اجدع الف مرة من المخروسين

وانكم شجع من العادلى وكلابه

اجدع من كل كلب مستخبى فى بدلة لو تعرف حقيقته تدوب وتسيبه ملط

اجدع من اللى ساكتين ومبرشمين متزعلوش هما بس نايمين

ونومهم تقيل مبيصحوش بالهز ولا بالتهريج

مبيصحوش من اول ندهة صحيح شكلهم ميتين

بس هم مش ميتين

هم بس نايمين بس خافين والتعب هاددهم فعاملين زى الميتين

بس اول ما يصحوا هما اللى هيسبقوكوا ان شاء الله

هنستناكم فى اى ابريل تختاروه هيكون فى مارس - اذار-رمضان او اى عيد هتخاتروه حتى لو فى ديسمبر هيبقى برضه عيد ربيع النهارده لما خفت اعلق العلم

افتكرتكم ولبست اسود على الرجولة

ونزلت الشارع مافيش لا حس ولا خبر مزعلتش والله مازعلت

قبلكم كان الاسود للحزن دلوقتى بقى للكلام المكتوم

السنه الجايه هتبقوا اكتر واكبر والناس هتبقى فاقت من النوم و الخوف اهم حاجه متزهقوش

عز الدين القسام بيقول "كنا ننزل كل مساء بسيوف وخيول فنحارب جيش مسلح بالمدرعات والبنادق وكان يموت منا كثير كانت معركة محسومة لهم ولكننا كنا ننزل لكى لا ينسانا الناس"

انزلوا عندنا كل ليله وان مكانش ابريل الجاى فابريل الذى يليه

مش مهم اخوان ولا ايمن نور ولا تجمع ولا الوفديين ولا حتى كفاية انتم اهم

حتى لو مكانش حد معاكم هما الخسرانين

اعملوها السنه الجاية بشعار مع المهنيين العمال الدكاترة الصيادلة المهندسين العاطلين المحاسبين او انشالله الجن الازرق لو ليه مصلحة

ومصر كلها تقف جنبهم نتواصل مع بعض نقف مع اى حد منهم او نقف كلنا مع بعض عشان مصلحتنا

المهم ان مافيش ابريل يعدى على الحكومة وهى قاعدة على مكاتبها مطمنة ان كله تمام التمام والخرفان بايته بتاكل وبتشكر وبتنام بقية اليوم

هيجى يوم وهيحصل المراد والناس هتفضل مضربة من سته ابريل لما يمسحوا التاريخ القديم كله

سبب نجاح اى حاجة فى الدنيا الاول هو الاخلاص وبعد كدا تيجى اى حاجه

رسالة الى كل اللى زيي

بسم الله الرحمن الرحيم "واتقوا فتنة لا تصيبن الذين ظلموا خاصه"

وادينا (انا وكل الناس) فى قلب الفتنة واحنا مظلومين مش ظالمين لان احنا سكتنا وطرمخنا وكمان قعدنا فى بيوتنا لما كان لازم نخرج وخرجنا لما كان لازم نقعد وقاطعنا الاضراب وخلاص يمكن يكون الاضرابات اخر حل الظلمة يحسوا بي وبكره لو المحطة دى فاتت هتقولوا انهم كانوا صوت العقل فى اوقات الجنون