البلد كلها كهربتها بتقطع

لان البشر المصرى يلهب عقله ويتعبه بالبحث فى كيفية تفكير الحكومة واسبابها ويجهد ذهنة فى اعطاء منطق للامور والاحداث واختراع نظريات لفهم واقع الحال
احب ان اؤكد وانا شخص منفرد اى اننى واحد "ناسه" لا ورايا جماعة ولا حد ضاحك عليا ومفهمنى حاجة غلط ولا مشربنى حاجة صفرا فى كوباية صغننه
احب اؤكد ان الحكومة مبتفكرش
ومافيش نظرية
ولا اى حاجة
احنا بيحكمنا ناس بتسرق بس
ببساطة ومن غير فلسفة
من غير تعقيد وتحبيك وتنظير وتعطير وتفكير
ومن غير برادعى ولا نور ولا مرشد ولا قائد منفى
احنا عندنا حرامية بيسرقوا زى حرامية الغسيل
بيقصوا الحبل من الطرفين وفى شوال وبيجروا
بس
ازمة قمح بتفاجئهم كل خمس دقايق
الكهربا بنصدرها
ومع ذلك بنية الدولة التحتية لا تتحمل موجة حر تستدعى استخدام مضاعف للكهرباء
مع اننا بعنا شرفنا عشان نبنى البنية التحتية
والريس قعد يذلنا بيها فى كل خطاب قاله من اول التمانينات لغاية اول 2000
احنا اتسرقنا فلوس وكابلات
وهاحكيلكم حكاية تثبت ان الية الفساد والافساد مالهاش نظرية دى كانت بتم كدا ببساطة ومن غير تفكير
من كام سنة طلعت هوجة الغاء الحشو من المناهج الدراسية وتنقيح المناهج وتطوير العملية
والحكاية كلها كانت ان مخازن الوزارة اللى فيها دفتريا ما يقارب 150 مليون جنيه مثلا مخزون ورق لطباعة الكتب
صبحوا الصبح لقوا فيها ب 50 مليون بس
ولتدبير العجز اقترح احد الصحفيين الحكوميين على المسئولين بعد لف وتدوير وتفكير
اقترح فكرة الغاء الحشو لتدبير عجز الورق فى مقابل مبلغ مالى محترم
بس
ببساطة من غير نية افساد النشء والكلام الكبير ده
ببساطة لو كان اعدائنا منحوا الشيطان منحة تفرغ فى الستينات ليضع خطة عمل لافساد هذه الدولة وهذا الشعب لما كان ليجرؤ ان يقدم لنا ما فعلنا نصفه

2 comments:

فاتيما Friday, August 20, 2010 4:42:00 PM  

ازيك يا نور

معاك كل الحق


ملقتش حاجة
ارد بيها
غير كلام
على سلامة



على باب سفاره كندا
لمحت أبليس وف أيده
أستماره
بقوله على فين
قالى بص
يا هجره يا أعاره
يا عم كفرت زهقت
ألاقيش معاك سيجاره


أنا أنتهيت خلاص
لا نافع وسواس ولاخناس
ولا ليا عيش وسط الناس
دى عالم مجرمين
عندكوا فائض ف الفساد
فى كل البلاد
ومش محتاجين شياطين



مليش عيش ف البلد دى
بقالى سنين عاطل
وأنتوا بتعرفوا
تقلبوا الحق باطل
وتسلكوا القاتل
وتمشوا ف جنازه المقتول
ومفيش مشاكل



يا عم ده أنا
بقيت أوسوس بالمقلوب
وأقول للحرامى كفايه
بقى
مش هتتـــوب
أنت هتعمل كل الذنوب
لوحدك
وأنا أبليس أشتغل واعظ
ولا كمسارى ف أتوبيس



يا عم دا أنا زمان
كنت أستنى حد ينسى يسمى
وهو بيأكل لقمته
دلوقتى كل أكلكم ملوث
وبصراحه الواحد خايف على صحته
ده مفيش ضمير أساسا
علشان أموته
كل واحد بمزاجه خربانه ذمته



يا عم دا كل حاجه أتسرقت
وكده الأجيال الجديده
من الحراميه ... أتظلمت
يا راجل دا من كتر
ما لطشت معايا
خرجت ف مظـــاهره مع الناس اللى بتقول كفايه
!!وبرضـــه مفيش فايــــده


خالص ودى
يا مالك الاجنحة

الكلمة نور Friday, August 20, 2010 5:26:00 PM  

الله
الله
حلوة اوى اوى
يا بنت الايه؟
عالجرح
انا على فكرة بيعجبنى اوى الجرنال اللى بتعمليه كمان على يمين مدونتك
عموما مساء الفل

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews