الشروق و السودان والبشير

معنديش خبرة عن شغلانه الصحافة وكل علاقتى بالصحافة انى باقرا جرايد بس اللى اعرفه ان الصحافة الحقيقة قايمة على الاخبار الحقيقية والتحليل
جزء الاخبار دا بيقى عبارة عن صحفى ومصدر
صحفى بيحقق المعلومة اللى بيمده بيها المصدر
ولان العالم اتغير من اللحظة اللى نقلت فيها السى ان ان حرب الكويت فى اول التسعينات ومعادش فيه حاجه بتستخبى اكتر من 3 ساعات فكان غريب ان الشروق تنفرد عن كل صحافة واعلام العالم بخبر ان غارة على شرق السودان على قافلة يقال انها تحمل سلاح كان سيحدث نقلة نوعية فى الحرب على غزة (صواريخ مداها 70 كيلو) واللى عمل الغارة اسرائيل.
الشروق انفردت بخبر متعلق بحرب غزة فى سودان البشير بعد حدوثه بشهرين السودان اللى فيها حرب اهلية - هيئات معونة – وكالات انباء – امم متحدة – شركات بترول دولية – منظمات حقوق انسان ولمن لا يعرف اغلب جواسيس العصر الحالى يعملون تحت هذه المسميات او على الاقل فى الزحمة دى الحرية بتكون اوسع.
وده معناه ان الشروق لها مصدر خفى فى السودان مصدر بيعرف اكتر من الاقمار الصناعية اللى بتشوف دبة النملة والبترول – مصدر بيشوف ومش بيتشاف – مصدر يعرف اكثر من الجزيرة ورويترز والاسوشيتدبرس والفرانس برس والبى بى سى والس ان ان وهاّرتس مصدر خفى عن ايران واعلامها مصدر خفى عن الحكومة السودانية نفسها اللى بتعمل تحقيق الان عن الغارة مصدر متغلغل يعرف معلومات اكثر من كل الهيئات والوكالات وربما يصنعها ايضا مصدر بيعرف دبة النملة فى السودان مصدر عارف الطرق اللى بيدخل منها السلاح مصدر يعرف جغرافية الدروب بين مصر بطولها والسودان ايضا ولكنه لا يستطيع ضرب قوافل السلاح بنفسه ولا مصادرتها بداخل ارضه فى عز معمعة حرب غزة وبيعرف يسكت وبيعرف يخبى المعلومات لغاية ما يكون لها اهمية مصدر اخفى المعلومة للحظة سوف تصبح ذات اهمية له فى الاساس وعالماشى سوف يستفيد يمد بها من يستطيع دفع ثمنها
مصدر اقوى اكيد من الجهة اللى هينشر عن طريقها الخبر
الشروق
الشروق اللى هيا فى الاصل الاهرام بعد ازالة الحشو واضافة بعض الشباب وخبرات دار نشر عريقة وكتاب وادباء وخط سياسى لا يكذب ولكنه ايضا لا يقول كل الحقيقة يكتفى بنصفها ومن النقد يكتفى بمعارضة الذيول ويترك اصل المشكلة الشروق عمرها فى السوق المصرى شهرين
ولان مالك المؤسسة ومصدر تمويلها هو ابراهيم المعلم
والمهندس رجل نارعلى علم لن اضيف كثيرا لسيرته المعروفة للجميع الا معلومة معروفه عن علاقته القوية بالنظام المصرى وبخاصة زوجة الرئيس واشتراكه كراعى رئيسى ورسمى لمهرجان القراءة للجميع كل عام وهو ما تحسبه على انها مشروع عمرها
واعود فافكر فى المصدر الذى سوف يستخدم المعلومة فى الوقت المناسب له بطبيعة الحال وفى طريقه سوف يمد بها احد الصحف اليومية الجديده كضربة صحفيه ينقل عنها العالم وتصبح اسما مرموقا يسعى ورائه الجميع وسيتلقى المصدر المقابل فى يوم ما وربما تصبح هى جريدة النظام الجديد يوما ما
كل اللى قولته ده احتمال 70% يكون سوء نية غير مبرر بس انا للاس اكتر حاجه اتعلمتها فى البلد دى سوء النية

عن السودان و البشير

السودان جاءها البشير على ضهر دبابات مصرية فى اواخر التمانينات ليطيح بنظام الميرغنى المنتخب بعد نظام سوار الذهب اول رجل عربى يترك السلطة طوعا فى العصر الحديث
البشير الذى انقلب على نظام مبارك الذى اتى به فى منتصف التسعينات واصبح نظام اسلامى
البشير اصبح اسلاميا ثوريا واشرك الترابى فى الحكم اوى بن لادن بامواله ورجاله واعطى الامان لكارلوس الهارب من جحيم الخيانة العربية المتكررة
البشير لما عرف انه ممكن يبقى اسلامى وديكتاتور وثورى من غير ترابى او بن لادن او كارلوس سجن الاول وطرد التانى
ثم فاوض فرنسا على كارلوس وعباه فى صندوق وشحنه فى طيارة خاصه وهو مخدر عشان يصحى يلاقى نفسه فى قلب باريس مسجون مدى الحياه
رغم انى مش متاكد اذا كانت اتهامات الجنائية الدولية ضده حقيقة ولا لا ! الا انى عايز اقوله ان كل اللى قاعدين يصقفولك دول محدش منهم فك الحبل عن رقبه صدام ولا حتى قال بم وانهم مهما دافعوا عنك باسم الكرامة العربية ومهما نشروا اخبار ان الاسلحة كانت بتروح لغزة من عندك فدا مش هيغير حقيقة تاريخك وعايز اقولك كمان بلاش تصدقهم لان واحد منهم هيربطك على ضهر توك توك ويوديك فى مشوار سريع مدفوع الاجر لغاية كينيا او تشاد او على الاقل هيسلمك للكمين الامريكانى الثابت اللى فى اول الدوحة
وكما تدين تدان

دليلك الذكى للانتحار اللطيف

1- اذا كنت انسان عادى بتفهم ساعات وعقلك بيهنج ساعات اتفرج على اربع حلقات متواصلة لمحمد حسنين هيكل على الجزيرة
2- اذا كنت انسان بتقدر قيمة الوقت ومهتم بالتكنولوجيا ادخل لتشاهد اى فيديو على اليوتيوب وانت متصل عن طريق خط التليفون وانتظر لتدفع الفاتورة اخر الشهر
3- اذا كنت ساداتيا ادخل مدونة جبهة التهييس الشعبيه
4- اذا كنت ناصريا ادخل على مدونة الوعى المصرى (ملحوظة اذا كنت حزب وطنى او تنتمى للعصرالحالى باى شكل فانت مش هتعرف تنتحر وكفاية عليك اللى انت فيه)
5- اذا كنت رقيق المشاعر كل طبقين فول حار الصبح من اى عربية وارمى نفسك جوا اول اتوبيس رايح على شبرا (خط طوالى) –يبدأ العرض اعتبارا من يوم الاثنين
6- اذا كنت من محبى الذهاب للبيت مبكرا اركب ميكروباص اخر فيصل من عبدالمنعم رياض يوم السبت او الجمعه ابتداء من التاسعه مساءا
7- اذا كنت ممن يقدرون قيمة الوقت ولا تهتم بالتكنولوجيا اقضى 5 ساعات على اى مقهى فى وسط البلد الثقافى متصنتا على حوارات جيرانك
8- اذا كنت متعصب فى انتماءك شجع نادى الزمالك او حسام وابراهيم حسن
9- اذا كنت قومى عربى وقضية القدس اهم عندك من ابوك وامك وبنتك القادمة ستسميها غزة وابنك ستسميه حماس اتفرج لتسجيلات التليفزيون المصرى وقت الحرب على غزة
10- اذا كنت من الاخوان المسلمين اتفرج على برنامج عمروعبدالسميع فى التليفزيون المصرى او اضرب صحوبية مع عضو فى حزب التجمع من انصار رفعت السعيد او اقرا كتب رفعت السعيد نفسه
11- اذا كنت رجلا لا تهتم بالسياسة ولا بالادب ولا باى حاجة لاتتعلق باكل العيش احضر اى ندوة فى حزب التجمع او فى اتيليه القاهرة اللى قدامه
12- اذا كنت من هواة الارقام القياسية ومهتم بقدرة البشر على القايم باكثر الاشياء استحالة شاهد محطات التلفزة الاماراتية وارقام دولتهم فى اكبر علم واطول برج واضخم جائزة
13- اذا كنت ممن يحبون الستر ويكرهون كل ماهو مبتذل وفضائحى ادخل على موقع العربية نت
14- اذا كنت لازلت تؤمن بالعرب كشعوب محترمه وممن يفهمون ببطء وتعانى الصداع حين تفهم اقرا تاريخ الصراع العربى الاسرائيلى مفصلا وسوف تتشقق راسك وتسقط قطعا فى فصل النكسة دماغك هتعلى تانى فى حرب 73وسوف تقلى مخك بالبيض مختارا فى طاسة وسخة بعد كامب ديفيد وسوف تعزم الجيران على شوربة مخاصيك فى حرب الكويت وبعدها لن تجد سببا لتعيش فقد فقدت اعز ما تملك
15- اذا كنت سنى المذهب بحق وحقيق وغيور على مذهبك وراجل من ضهر راجل اختر اى ممن بين الاقواس (شيوعى – ناصرى – مثقف من وسط البلد – عم رجب القهوجى)واخبره اننا لا يجب ان نثق فى حسن نصرالله ونسلمله كده من غير تفكير
16- اذا كنت تملك ذرة دم واحساس اتفرج على تغطية الجزيرة لاحد الحروب التالية (حرب غزة – حرب لبنان الاخيرة – حرب العراق)
17- اذا كنت رجل جاد وتقدر مهنة الكتابة والكتاب وتصنف نفسك على انك قارئ جيد اقرا لعمر طاهر – خالد الخميسى – علاء الاسوانى -
18- اذا كنت من سميعة الصدر الاعظم هيفاء وهبى (مع الاعتذار للشيعة) اسمع 5 اغانى لاحمد منيب او بحر ابوجريشة
19- اذا كنت من سميعة منيراو مارسيل خليفة او الماجدة فكل من مصطفى قمر او تامر حسنى او زيزى (حسب سنك)يفى بالغرض
ملحوظة لو كنت بتسمع فيروز خسارة تنتحر
20- اذا كنت انسان حساس وتقدر نعمة الحياة اسمع اغنيتين لهانى شاكر وتحبس وراهم باغنيتين لمصطفى كامل
21- اذا كنت مدخن بتفهم وكييف قديم دخن بوسطن او بلمونت اللى تلاقيه
22- اذا كنت من اللى خلقهم ضيق وبتتنرفز لما يحد يزودها اتفرج على حلقة كاملة منى الشاذلى
23- اذا كنت تحب المذيع خفيف الدم والبرنامج اللطيف اتفرج على معتز الدمرداش
24- اذا كنت من هواة برامج التحليل السياسى وتحب الكلام التقيل اسمع عادل امام وهو بيتكلم فى السياسة كسفير
25- اذا كنت من بتوع التهريج البايخ اخبر كمسرى الاتوبيس المزدحم انك لا تقبل العملات المعدنية
26- لو الطريق بينك وبين صنف امين الشرطة مش عمار وبتكره المخبرين اتفرج على تامر امين
27- لو عندك حساسية من فلوس العرب اللى بيدفعوها عشان يلمعوا نفسهم على قفاك اتفرج على مصطفى بكرى فى قناة الساعة
28- اذا كنت عاطل وتريد الحرية عليك واول مركب طالعة اليونان
ملحوظة اذا كنت قد تقرا هذه التدوينه فهذا معناه انك قد رايت الامريكان يدخلون بغداد وشاهدت صدام وهو يعدم فى صباح العيد الكبير ورايت القذافى وهو يسلم كل منشاته النووية ببلاش بعد ماصرف عليها ملايين لانه شاف صدام بيرقص على الحبل وطبعا شوفت قطار الصعيد والناس مشوية جواه يوم وقفة العيد وشوفت العبارة وهى بتغرق والناس بتغرق فى عز البرد ومؤكد شوفت صخرة الدويقة وطبعا شفت قانا 3 اربع مرات فى حياتك بتكرار كربونى وضرب غزة لوحدها بتاع 15 على الاقل وطبعا سمعت ان الناس قتلت بعضها على جسر الجمرات فى الحج 10 مرات فياصديقى متتعبش نفسك الطرق اللى فاتت دى مش هتقتلك بل بالعكس هتنزع اخر شوية احساس جواك
حلك يامعلم ان تحضن التوربينى حضن بشوق وهو خارج من قليوب
او تعوم فى شط هادى فى اسكندرية وتعدى البراميل 0العلامات يعنى .
عدى نفق العروبة على رجليك وبعدين اجرى فجاة ناحية القصر الجمهورى
او روح جاردن سيتى وحاول تقتحم الشارع اللى قبل السفارة الامريكية
او اقف قدام اى قسم شرطة واشتم المامور بامه
وربنا معاك

ان يساء فهمك

يقول الصينيون القدماء ان اصعب اربعة مواقف قد تمر فى حياة اى جثه بتحس
- ان تقول احبك لشخص لا يحبك
- ان تنتظر شخصا لن ياتى ابدا
- ان يساء فهمك
- ان تحاول ان تنام فلا تستطيع
و بالنسبة لى ان يساء فهمى هو اول الاشياء فى الترتيب ودون النظر للحظات التى افقد فيها القدرة عن التعبير عن نفسى وتلك التى اقع فيها تحت تاثير نظرية المؤامرة فترتسم فى وجهى او نبرة صوتى امارات تحدى مستفزة تجبر من يسمعنى انى يسئ فهمى ويزيح عن كتفى عبء خلع عباءة الخجل فى حوار لا يحتمل خجل
تبقى بعد ذلك الحالة المرعبة من سوء الفهم - الحالة التى تريد فيها ان تكون متكلما بارعا فيصمت لسانك ان تحاول ان تنظر بحنو فتخونك عيناك ويخفو منهما بريق تحبه ان تحاول ان تكون رقيقا فتتوتر اعصابك وتبدو كسفاح مثل لتوه بجثتين او ان تحاول ان تصلح كل ماحدث سابقا بقول يمسح الاثر الفائت فتقع اسيرا للعنة تاريخك فيصاب الكلام بالسكته على شفتيك ويخرج كطلقات تقتل وهنا ينتهى كل شئ ويصبح الحنو الذى اردت ان ترا اثره فى رفيقك كصفعه وقلبك الذى اردت ان تقدمه هدية مجرد قنبله وانفجرت ولن تقبل منك هدية بعدها.
الخوف من ان يساء فهمك هو مايدفعك لان تتفهم الاخرين ان تلتمس لهم عذرا لا يعرفوه فى انفسهم
خطأ لم يقصدوا فعله ولكنهم لاحقا سيتعاملون مع نتائجه مجبرين . وينتظرون رد فعل يساوى اخطائهم ويتصرفون مسبقا على اساسه
هنا ربما يعنى لى شخصيا ان التفهم هو القدرة على تقمص دور شخص اخر وتلمس موقفه والاحساس بمخاوفه- القدرة ان تخلع قلبك وتتلبس قلبه والتماس العذر له دون التورط النفسى فى استباحة منكر او انكار امر جميل حتى ولو بقلبك فقط تعرف لماذا فعل شيئا لا يبدو لاحد كشئ مبرر بل يبدو فعلا عدوانيا يجافى منطق المبادئ القويمة.
وان التسامح هو كل هذا مضافا اليه القدرة على نسيان نتائج الافعال التى قد سببت لك الالم
وكل هذا لا يبدو فى مطلقه هبة ربانية صرفة فهو فى معظمه تدريب صبور على التسامح فيما يجرح الكرامة ورقة الروح هو رياضة للنفس للعلو عن النقص وتحمل شدائد تهون بجوارها عطش وجوع الايام والم جروح البدن وهو اخيرا تبنى لموقف تود لو ياخذ تجاه افعالك الشخصية المتسرعة والغاضبة والتى جانبها الصواب
لقد خسرت اشخاصا كثيرين -ولازلت- لانى لم اتفهم خوفهم وفقرهم الروحى والمادى لم اتفهم خوفهم على كيانهم لم اتفهم كبريائهم الذى لا يقبل الهزيمة لم اتسامح مع غضبهم وجهلهم لم اتواصل مع الجزء الذى احبه بداخلهم فى لحظات فقدت فيها الاتصال مع قلبى ايضا كنت احمل كرامتى فوق جلدى لا تسلم من الهواء حتى
ولكنى الان خبئت كرامتى فى داخل قلب من يحبوننى هم فقط يعرفونها ولا يجرحونها اما الاخرون الذين لا يعرفوننى فلا يستحقون ترف التمتع بها معى
اخدت عهدا على نفسى ان اتفهم فى الاخرين خوفهم من الموت والاهانة - الخوف على الحياة - على العمل – ان اتفهم دوما انهم بشر يعيشون ربما بسقوف اقل مما املك
وسوف اسامح كل من سبب لى الما حتى لو كان لا ينسى
سوف اسامح من ظلمونى او تقولوا على
سوف اسامح من جرح كرامتى قبل ان اخبئها ممن لا يستحق
سوف اتسامح مع كل من عبر على ليجد طريقا حتى لو لم يكن يستحقه
سوف اتسامح مع كل من اساء فهمى بدون كل الاسباب السابقه
واشهدالله انى قد سامحتهم ابتغاء ان يسامحنى يوم لن استطيع ان ارد مظالم من ظلمت سائلا اياه ان يرد مظالمهم
وابتغاء ان يمسح عن صفحتى ذنوبا من فرط بؤسى نسيتها وتقصيرا لن يكمله العمر ولو طال

ليه وليه وليه وليه

معرفتش ليه دايما مصر بتتنادى على انها مؤنث وليه هى ام الدنيا وهل دا خلى كل واحد يحكمها يفتكر نفسه ابو الدنيا او ابو على على الاقلوهى لو واحده ياترى كانت رجليها حلوة ولا هو وسط البلد بس اللى جميل ؟
وبعدين كل اللى اتجوزوها سكنوا عندها ليه؟ وازاى قبلوا على نفسهم يسكنوا فى بيت حريمهم؟ ثم لماذا اصر كل حكامها غير المسيحين انهم يمشوا الشريعه المسيحية وميطلقوهاش الا لما يسيبوها ويخرجوا على ضهرهم وقالوا لا لطلاق الا لعلة الزنا واحنا حريمنا اشرف من الشرف؟
وليه رغم انهم كلهم قالوا انهم بيحبوها مكانوش بيغيروا عليها ؟ كل واحد منهم قبل مايخرج على ضهره كان يجيب عريس مراته ويسكنه معاهم؟
وليه دايما كان الشيوخ بيفتوا دايما ان ابو الدنيا من دول ممكن يجوزها لابنه بس بعد ما يموت؟ مع انه حرام فى كل دين
وهل لو اتجوزها جيمى هانبقى ولاد حرام؟
وليه كل اللى اتجوزوها اتجوزوا عليها؟
ليه اصلا قعدت مليار سنه ممتجوزش الا ناس غرب عنها ؟
واول ما قالوا نلمها على اللى من لحمها طلعوا ميتين امها؟
هل يعقل ان مصراللى مدخلتش حرب فى تاريخها الا وكسبتها متعرفش تطرد اللى اخدين حقها؟
ووهل ده له علاقه بانها معرفتش تربى عيالها وسابتهم نايمين تحت كوبرى المنيب؟
واللى فلح من الاغلبيه بيشتغلوا فى الموبايل او راكبين تكاتك والباقين بيصرفوا فلوسهم على الموبايلات؟
وليه لما عبدالناصر سجنها وساب اصحابه يقطعوا من لحمها محدش طلقها منه بالشرع وفهمه غلطه؟ قالوا انها قالت كان معجبانى وحليوة و بيحب العيال ونيته كانت حلوة
وليه لما السادات مضاها على تنازل عن القايمه والمؤخر وسابها شوليطى موليطى محدش اخدلها حقها من الورثه ؟ قالوا انها قالت انا شوفت معاه ايام كانت حلوة
وليه لما مبارك فرج عليها امة لا اله الا الله وخلى راسها فى التراب ورجليها تسند السقف للى رايح وجاى مطلبتش الخلع؟ قالوا انها قالت اصل اول مرة اتجوز موظف وانا باحب الموظفين
وسبحان الله ورثت من كل اللى ضحكوا عليها عقاراتهم واشيائهم وفرجت السياح على خيبتها وكسبت منهم؟
الف مليون ليه بتخبط جوا راسى زى مدفع كور فى ملعب اسكواش وكل ما اسافر واوصل فى المكان اللى انا اتربيت فيه
واشوف الناس بتوعى بتوع زمان

واشوف هى عملت ايه فى الناس اللى بيحبوها لله بافتكرها وتشغلنى

عالعموم الله يسامحك

صنف القهوة كان عالى اوى والكليوباترا كانت بيضه مش مكتومه

الى اخوتى العاديين الذين اوسعوا الدنيا ركضا ولم يصلوا
الذين بداوا الحياة ب 50 الف حلم كبير على الاقل وانتهى بهم الامر بحلم ان يجددوا مدفن العائلة ولاحقا سيدفنون احياء على قارعة الوطن
الى الذين يستقيظون كل يوم فى اللصباح الباكر والجزمة على بوزهم
الى الذين يتكدسون كل يوم فى محطات الميكروباص والاتوبيس والمترو وبسيارات صغيرة فى طابور البنزين 80 بوجوه كئيبه ليذهبوا الى اعمال لا يحبونها ليقبضوا اموالا لا تكفيهم ليشتروا بها اشياءا لا يريدونها
الى الذين يتوقون لامراءة تشاركهم الفراش واحلامهم وهمهم وتغفو عيونهم كل ليله ومفطورة قلوبهم
الى الذين يبييتون كل ليله ويقولون ان فرج الله قريب
والذين يقولون يحلها الحلال
الذين يقفون فى طابور العيش ابو شلن عشان ابو ربع مينفعش
الى الذين باعت لهم الميديا الوهم فظنوا انهم سيصبحون مغنين وممثلين وكتاب وشعراء ومشهورين ويملاهم المال والشهرة حياة بعد حياة
الى الذين ظنوا ان كل شئ رأوه كان حقيقى فلما حانت لحظة الحقيقه انعقدت السنتهم والتوت شفاههم واصبحوا اصدقاء للصيدليات وادوية الضغط والسكر وحبوب القلب
الى الذين ظنوا ان الله خلق لهم السنه ليقولوا الحق وبعد اول صفعه تنكروا لصورتهم فى المراة يتكلمون
الى الذين جهزوا اوراقهم للهرب واحرقوا امتعتهم لكى لا تثقل سفرهم وانتووا نسيان ماضيهم
وابقاهم بكاء امهم المكتوم وقول ابيهم "مين هياخد عزايا؟"
الى الذين لا يبكون لكى لا يبدوا ضعفاء
الى الذين يريدون ان يبدوا منتصرين طول الوقت لكى لا يخيبوا امال احبائهم
الى الذين خذلتهم الدنيا وظنوا انه من العدل الا يخذلوا مرة اخرى فخدلتهم مرات ومرات
الى الذين لبسوا العوينات الطبيه واجتاح الشيب رؤوسهم مبكرا جدا
الذين اقتنعوا غصبا وغضبا وفقدوا بين التمييز بين الطموح والطمع وبين الرضا والاستسلام . فذبلوا مثل شجر الخريف
الى الذين لم يغدروا بمبادئهم ولم يلقوها فى الجب
الى الذين تتساوى فى عيونهم كل الاشياء يطمحون لدعوة امهم فى صلاة الفجر
الى الذين سمعوا حكايات الكبار وصدققوها عن عيش زمان وبيض زمان وجنيه زمان والبطيخ الشلين بتاع زمان وصينية القلل الى مسقية ماورد ساعة عصارى وشجرة الفل التى احاطت المكان بالرائحة المميزة
الى الذين لم ياكلوا الا البطيخ المسرطن والخوخ المعالج ولا يعرفون معنى كلمة اورجانيك
الى الذين يظنون انهم ابناء الغد وان فرصتهم لم تحن بعد – أليس الغد بقريب-

ايه ياعم انت هتخطب انا مستنيك تخلص من الصبح
قلبى نط فى زورى ووشى احمر وحسيت انى هاموت من المفاجاة مسكت المنفضة بطرف صباعى وحدفت راسه
اتفادها وهوا قاعد على الكرسى من غير معاناة لزقت فى الحيط ورسمت رسوم سريالىه عليها وفى الاخر نزلت فرشت محتوياتها على ارض الاوده
قال: ايه يا معلم اللى انت عملته ده ؟ ريحة الاوده بقت زباله
قلتله انت غبى ؟ حد يعمل كده ؟ دا انت لو بهيم فى زريبه متقاطعش حد كدا
هو: ما انت عامل فيها سعد زغلول وفاكر نفسك واقف ميدان طلعت حرب تخطب ومش راضى تنهى قلت اعمل منكش جايز كنت نايم وانت مفتح
مرديتش عليه وقومت وانا باحاول اركز انا كنت فين
حطيت بن فى الكنكه وسكر تموين قليل وشوية ميه ساقعه وقلبت اللى فى الكنكه وانا باجمع فى راسى انا كنت فين؟
فتحت عين البوتاجاز النار زرقه وشكلها يتوه وطيتها عالاخر وولعت سيجارة وخدت اول نفس ودايما افضل نفس
سرحت فى نار البوتجاز ودخان السيجارة بيلف زى تيار هوا بارد فى ليله سخنه جوا دماغى ورجعت للى كنت فيه
هو: دا انت حالتك وحشة اوى النهارده ...................مالك؟
فكرت ان مافيش امل من النرفزة والشخط والصداع وان الحل انى اسيبه واخرج بس انا ماليش مزاج اشوف حد
قلتله وانا بامثل الهدوء وعنيا على القهوة وايدى على ايد الكنكه البلاستيك : مافيش مضايق شوية وكنت عايز افضفض
هو: ودى فضفضة يا معلم كل اللى انت باتكلمهم دول دلوقتى يا نايمين فى سابع نومه عشان يصحوا بدرى او عاملين عقود مع النواصى بتاعتهم وبيرولوا سيجارتين او بيدرولوهم على معدن يعملولهم كبايتين
انا : دا انت عبيط بقى انت مش فاهم الفكرة ياقفص
انا باشغل نفسى بنفسى وبعدين نواصى ايه ومعدن ويرلوا ايه بس مش تنضف فردة الجزمة اللى على رقبتك دى؟
القهوة كفرت من النار وعايزه تخرج من الكنكنه رفعتها- صبيت الوش – غلوة صغيرة للباقى – كملت صب البقية
قفلت النار شلت الكباية الصغيرة وريحة البن طالعة على مخى على طول من غير وسايط
قعدت على الكرسى ولعت سيجارة- شفطه صغيره – بدات اعصابى تسترخى

الى متوسطى الذكاء والغير موهوبين والذين لايجدون الوقت ليتعلموا
الى الذين فقدوا ايمانهم بانفسهم ووثقوا فى ملابسهم واموالهم
الى الذين امنوا بالبنوك والقروض وبتقسيط الاعوام الطوال
بوركتم وبورك صبركم الذى كسى الجلود بورك دمعكم وحزنكم الذى غسل القلوب
وليلعن الله من رسموا لكم الخطى ووعدوكم انهم فى اخر الطريق ينتظرونكم
لن يستقبلوكم فالخير فيكم اقوى من ان يتحملوه
بورك ايمانكم بالله وبالمستحيل وليحترق صمتكم فى الجحيم
العنوا خوفكم من ضياع العدم الف مرة
بورك فقيركم المسكين وليغرقن الله فقيركم الذى اصبح من الضالين فقد خسر نفسه ولم يربح شيئا
جبر الله كسر نفوسكم وسلط على من كسروها مردة هم يعرفونهم من الجحيم
بوركت الطيبه فيكم وفى نهر النيل تعطون دوما لمن يريد ومن لا يريد
وسحقا سحقا للسذاجة الف مرة والتساذج مليون
فليحرس الله الابيض والاسود الواضح خلف ضلوعكم وليديم ضيعة من يريدون خلطه بسن الفيل
نور الله اياما تحتفظون بها رغما عنكم بالامل و احاط ياسكم فى كل مرة بامل جديد
بورك فى رضاكم وبركم باهلكم والجنة التى اختلقتوموها فى قلب الجحيم
الى كل المساكين مثلى لكم الله
فمن غيره يغفر ومن غيره يجير

ولما وصلت للنقطه دى انخسأ ابن الكئيبه

وطنى الزمان

مابحبش التمانينات كان دمها تقيل على قلبى وهى محبتنيش يرضه
مدرسة الواقعيه فى السينما خلتها كئيبه الموسيقى كانت زباله
بعد عمار الشريعى كموسيقى ومحمد منير كحالة مكانش فيه حاجه تفتح النفسمكنتش بافهم منير عايز يقول ايه بس كان حاجه فى الموسيقى والكلام بتشدنى فهمت بعدها انه الصدق
فى الكورة كنت اهلاوى بغباوة وبدون قصد اصله كان بيكسب على طول
التليفزيون كان زبالة اوى مسلسلات طويلة وصورتها كئيبه التتر بتاع ماتشات الكورة
برنامج اخترنا لك ماما نجوى باب ماجد عالم السيرك

الجرايد

الاهرام الجمهورية المساء الاخبار روزالايوسف لزوم الصور الشعب شوية عصفورة الوفد
ابراهيم نافع – صلاح منتصر – انيس منصور –مصطفى محمود- محمد سلماوى
انا ابن موظف يعنى الاهرام كان واجب واهرام الجمعة زى صلاة الجمعه
كل اللى بيتكب كان شبه بعضه

حاجه كانت منيله خالص
فضلت التمانينات اللى اوعى عليها تضايق فيا وانا اهرب منها لما دخلنا التسعينات
بدات افهم شوية
سمعت البى بى سى وابويا بيقرا اهرام الجمعه ومشغلها جنبه يوم جمعه وهيا بتقول
ان رفعت المحجوب اتقتل فى الشارع وهوا فى عربيته اتنين بموتوسيكل قتلوه
فتحنا التليفزيون وزير الداخليه عبدالحليم موسى عامل مؤتمر صحفى وبيسال انتصار اللى لغاية دلوقتى معرفش هيا مين؟
هوا كان هيقابل الوفد الكورى ولا السورى يا انتصار
وبدأ القتل ..... كل يوم حادثه وصفحات الحوادث مليانه بالتنظيمات
العائدون والمكفرون واللى بيهاجرواواللى موجودين اصلا
التسعينات لما بدات كان طعمها زى طعم الدم
الغاء الانتخابات فى الجزائر والعسكر ركبوا
ودم للركب
الحادثة فى الجزاير بيموت فيها قرية بالكامل القتل بقى عادى
مفهمتش ليه ؟سالت محدش دلنى
الجرنال مكانش بيتقطع من ايدى كل يوم ادور على جديد مش فاهم برضه
اسمع البى بى سى يعجبنى صوت المذيعين سمير فرح – على اسعد – نورالدين زورجى
بس بيقولوا حاجات معدتش عليا قبل كده
يوم خميس فى الصيف كان عندنا فرح فى البلد ولازم نسافر الصبح بدرى
صحيت من النوم وانا غرقان عرق على ابويا بيقول العراق دخلت الكويت
مبارك كان بقاله اسبوع قاعد يروح الكويت وبعدين العراق ويرجع من هنا لهنا
جابوا الصور فى الاخبار بلد فاضيه والدبابات ماشيه فى ميدان وعساكر بيكسروا عربيات
القتل بقى من غير سبب فى مصر انفجارات كتير فى ميدان التحرير شيماء الطفلة بتموت الدولة بتعملها مولد

الريس بيوجه نداءات لصدام
وصلوا 27 نداء صدام مش هيرجع عن اللى فى دماغه بيقول بلدنا وفلوسنا والناس دى سرقتنا
وقف حرب مع ايران وبدا حرب تانية
الصعيد بقى عامل زى جهنم الحمرا
اللى بيموت بيموت واللى بتاخده الشرطة مبيرجعش
بلدى كان فيها ناس ملتحين كتير الاعتقال بقى من غير سبب
امريكا دخلت السعودية بعد ماكل الدول العربية وافقت وبعتت قوات كمان السورى جنب الانجليزى والمصرى قدام الامريكانى
الريس توقف عن ارسال نداءات وبدا يبعت الجيش
واحد من العيله اتطوع فى الجيش لانه كان عايز يتجوز وهيدوا للناس اللى هتحارب فلوس كتير
واحد تانى من المنطقة جارنا يعنى سافر الكويت فى يوليو عشان يشتغل رجع بعد الغزو ومعاه فلوس كانه بيشتغل من 40 سنه
المصريين اللى فى عراق اتقطعت اخبارهم
صدام بيقول انه هيضرب النيل بالسلاح الجرثومى لو مصر معقلتش
انيس منصور بيقول فى الاهرام ان جراثيمنا تاكل اى جراثيم فى الكون يعنى بصريح العبارة ريح نفسك مش هنعقل
انفجار فى القاهرة والمقصود صفوت الشريف
الناس بتموت بالعبيط
والاعتقالات بالعبيط برضه الحقد بيزيد
شوارتزكوف بيطلع فى التليفزيون اكتر من حسنى
القائد الركن خالد بن سلطان شكله اول مره يشوف دبابه مش قائد وركن كمان
صدام بيرمى صواريخ على السعودية والعقيد ماجد الربيعان بيقول سقط امس صاروخان من طراز سكاد
وقد تصتدت له صواريخ باتريوت الاعتراضية ودمرته فى الجو
3 صواريخ كل يوم
الظهران- الرياض – حفر الباطن
قرايبنا اللى فى السعودية بيبعتوا شرايط متسجل عليها صوتهم اصل موضوع التليفونات كان صعب اوى
ايامها بيقولوا انهم بيباتوا كل ليله وخايفين من الصواريخ وبيسدوا شبابيك وابواب البيوت ببطاطين مبلوله عشان الاسلحه الكيماوية
بدا صدام يرمى صواريخ على اسرائيل
خدنا اجازة من الدراسه كانوا خايفين يحدفنا بالصواريخ
مبارك بيقول ان سكاد زى بمب العيد
ظباط الداخليه بقوا بيخافوا من خيالهم
الدم بيزيد
الايام السوده بتجيب ايام اسود
عبدالله الرويشد بيغنى اللهم لا اعتراض
واخبار عن موضوع مش لطيف اتمسك قيه متلبس بعدها بشوية
اللى متغربين فى السعودية رجعم واللى فى العراق اللى بيعرف يكت بيكت والباقى مختفى اللى ليه فلوس بورق اصفر واقع فى حيص بيص واللى لسه هناك مش عارف يرجع الا لما يهرب فلوسه عشان متبقاش ورطة
الحرب قامت دخلوا الكويت المصرين بيقولوا انهم بيعاملوا الاسرى العراقيين كويس
الكوايته بيرشوا ورد على الدبابات المريكانى
الشيخ جابر رجع وباس الارض كانت واحشاه
الحرب خلصت وسابوا صدام وقالوا كفايه ان احنا ادبناه
الاسماعيلى خد الدورى المصرى لاول مرة من تلاتين الف سنه
والمرة اللى قبلها كان سنه النكسة
القتل مبيهادش فى الجزائر ولا مصر
لوكانت التمانينات دمها تقيل على قلبى
فالتسعينات كانت كارثة كان الخوف فى كل شارع والكبت ساكن فى البيوت اللى بتعرف انه له قريب منضم لجماعه اسلامية بيتاخد العاطل فى الباطل ابوه امه اى حد من ريحته
يوم عادى فى الدراسه وبعد مارجعت اتغديت ومأنتخ وباسمع البى بى سى لقيت الكنبه بتتهز
امى صرخت ....... اخويا بيتفرج على التليفزيون فجاه بيقول زلزال فى مصر
واجازة من الدراسه الناس بايته فى الشوارع
اكثم بيطلع من تحت عمارة فى مصر الجديده بعد مش عارف كام يوم
التبرع بالدم- حملات التبرع بالفلوس – مشروع الالف مدرسة
البلد كانت بايشه ولما اتهزت اتفرطت للحق كل حاجه اتفرطت
مليون حاجه كبيره اوى تهز اى مكان فى الكون
قلبى اتوجع اوى وانا باكبر ومحدش كان مستعد يفهمنى لان محدش كان فاهم
بس قلبى اتوجع من الدم اللى شوقته وكان فى شباب من سنى زمايلى وجيرانى ودخلوا المعتقل فى ناس منهم خرجت ابتداء من سنه 2002 دخلوا عيال وخرجوا رجاله على اكتافهم جبال وهجروا كل اللى ليه علاقه باى حاجه
منهم واحد حاطط سماعة ووكمان فى ودنه طول النهار بس للاسف مش موصوله بجهاز
وواحد تانى اول ماخرج اتجوز ووقف فى سوبر ماركت بس باستمرار عينيه مدمعه زى مايكون كان بيعيط او لسه هيبدأ خلف وبيخاف على بنته من هوا الصيف
بقينا فى نص التسعينات وقربت اخلص ثانوى وادخل جامعه بس بقلب زى السفنجة الناشفه عايز يشرب من كل حاجه والجامعة فى مصر ام الدنيا
ويامرحب بالمعارك
· اى خلل فى التواريخ طنشه فانا كنت باحكى بطريقه تداعى الافكار والغلط مش مقصود فى النهاية
ملحوظة : لغاية اللحظة اللى باكتب فيها التدوينه دى فى واحد كان زميلى لسه فى المعتقل مخرجش
سمعت ان بقى معاه 3 ليسانس وماجستير ودكتوراه ومش راضى يمضى على مراجعات الشيخ سيد امام.

من ده كتير

ياليله طين فجأة بقى عندى 31 سنه وفار العمر من الكسرولة لما نسيته على النار
لما كنت فى ثانوى كنت بابص على اى حد عنده 30 ومعملش حاجه واسال نفسى طب هوا عيش ليه
المشكلة انى اكتشفت انى بقيت زيهم فى يوم الصبح بدرى
وانا مش انسان اللى من نوعية اول ما اصحى يبقى اشتغلت
لا انا بافضل مهنج لمدة ساعتين تقريبا
وبعدها ابدأ استوعب اللى بيحصل حوليا واللى بيتقالى وافهم ويمكن اضحك بعد 3 ساعات
فى الاول بعد صباح الفل يا دنيا والمية الساقعه
انزل اضرب طبق فول وش القدرة على العربية اى عربية
للحق طبق الفول ده بيزود التهنيجة وعدم الفهم وابدأ اتمشى عالهادى
لغاية القهوة والمسافة من العربية للقهوة بتبقى اصعب 30 متر فى اليوم
اطلب شاى بحليب افرقعه مع سيجارة لانى مش باشيش
اول نفس من السيجارة بيخلينى اكح
الكحة بتخلى صدرى يطلع صوت زى صوت العربية لما تحاول تدورها الصبح
الكحة بتخلى الكونتاك يشتغل تبدأ عنيا تفتح وودانى تسمع وعقلى يستوعب
لما الشاى بحليب يخلص تكون القهوة المظبوط الدوبل وصلت
اولع للقهوجى سيجارة تحية صحيان
مع اول شفطة من القهوة المرارة ترعش جسمى من جوا وانتعش
ابدأ احس بالدنيا حر ولابرد واعرف اذا كان الفول بتاع النهاردة حلو ولا القدرة اتسلقت
وابص بعنيه على بتاع الجرايد واركز مع راديوالقهوة
فى اليوم ده فتحت عينيه فجأة كانى مكنتش نايم وصاحى بالعافية عينيه بتبحلق فى الفراغ
ودماغى صافية زى ما اكون صاحى من بدرى
اتقلبت على ضهرى كما العادة قبل ما اقوم
بصيت فى السقف لقيت ابن الكئيبه قاعد عالمروحة ومدلدل رجليه
عرفت انا صحيت فايق ازاى
قالى صح النوم يا معلم حد يبقى كسلان كده يوم عيد ميلاده
قلبت شمال ومرديتش عليه بس من جوايا عرفت انه هيبقى يوم اسود
وان انا مش عايز اقوم من السرير
مسابنيش لما اتقلبت لقيته قاعد على الراديو الصغير اللى جنبى
وبيضحك ومبيتكلمش
قولت جوايا مش هايسبنى فى حالى
مديت ايد على الكرسى شديت الفوطة ونزلت رجليا وقعدت على طرف السرير جمعت
نفسى ورحت قايم
لبست شبشبى من باب الحمام دخلت فتحت الميه لقيته قاعد على رف المرايه
صوته كان خايف وهوا بيسالنى :انت زعلان منى؟.
طنشته وغسلت وشى وعملت كل الواجبات واتنشفت ونشرت الفوطة ودخلت الاودة
لقيته ممدد على السرير وبيقولى مالك ساكت ليه؟ هتعمل ايه النهاردة
قلت اديله الوش الخشب عشان يخاف ويتكسف ويهرب
صرخت فيه : وانت مال امك
اتكسف كتم النفس
غيرت هدومى لبست اللى لقيته فى وشى
نزلت من الشقه خبطت الباب ورايا
كنت متنرفز ودماغى برضه مجمعه مجاليش نفس افطر
ولا اشرب حاجه ولعت سيجارة
اكتر حاجه باكرهها السيجارة من غير فطار
هوا الصبح البارد خبطنى فى وشى ارنبة مناخيرى بردت
حسيت انى عايز اتمشى والشوارع فاضية
كنت بافكر فى عيد ميلادى فاتكرت ان السنه اللى فاتت كنت فى وضع اسوء من كده شوية
ارتحت شوية و حسيت ان المشى هيجرى الدم فى جسمى شوية واصحصح
انتشيت لما لقيت الدنيا فاضية وزى ماتكون مغسولة قلت لنفسى صباخ الفل ياواد
كل سنه وانت طيب ورب ضارة نافعة
دلعت نفسى بحته تونكيز وعلبة سجاير ميريت اصفر وقلت فى بالى مش اقل منها فى عيد ميلادك يا برنس
فرمت التونكيز وفكيت العلبه وطلعت سيجارة عجبتنى السيجارة والتبغ متوزع جواها بنظام ونعومة وشكلها النضيف ولعتها ومشيت ادندن والموسيقى طالعة من جوا دماغى. شوية عبدالوهاب فريد
كدا يعنى الدندنه جوايا.
رحت الشغل قعدت على مكتبى لما التليفون رن بصيت على الرقم عرفت انه صاحب الشركة الدندنه قطعت من دماغى قلت جوايا يا فتاح يا عليم يا رزاق يا كريم
انا :صباح الخير يا ا فلان
هو:صباح النور يا سيدى
هو برضه :ايه اللى حصل مع ا فلان امبارح اتصل بيا الصبح والراجل زعلان وهددنى انه هيجمد شغلنا عنده
انا ببرود : محولتوش عليا ليه يا باشا
هو بعصبيه: ليه هو انا مش صاحب الشركة دى برضه ولا انا صورة
انا : لا ازاى يا استاذنا دا انت اللى علمتنا الشغل
بس انا جيت الشغل على اتفاق ان انا اللى مسئول عن الفرع ده وكل تعاملاته وكل اللى حصل مع ا فلان امبارح
كان خلاف لانه عايز ياكل علينا نسبتنا ويبيتها عنده للصيف الجاى وبطريقة لوى الدراع .
هو: تقوم تشتمه وتشرشحله
انا بنرفزة وفراغ صبر : فى ناس مبتجيش غير بالعين الحمرا وبعدين لو استمرينا معاه هيخسرنا ومش هنقدر نتكلم معاه وفى الاخر انا باتحاسب كل ست شهور على نتيجة الاعمال بارقام
هو: انت هتبيع وتشترى فيا يقه
انا وبقيت مش شايف قدامى : لا ابيع ولا اشترى البضاعه متساويش
ا فلان المسئول ورايا قاعد بره وهوا عارف الشغل جاى منين ورايح فين انا ماشى وانا هاجيلك بكره نصفى حسابنا قفلت التليفون
قمت خرجت وقلت للمسئول ورايا اتصل بمدير الشركة
انا ماشى
نزلت ولعت سيجارة تانيه وعفاريت الدنيا بتتنطط قدام عيينيه
فكرت: انت اتسرعت ياعم
لا اتسرعت ولا حاجه الشغل لو ماخدتش فيه موقف اللى رايح واللى جاى هيلطشك ويعمل مش وخد باله
قعدت على قهوة طلبت كباية شاى شربتها وانا باتفرج على الناس اللى رايحه وجايه
وانا من زمان الفرجه على الناس هواية عندى
دماغى انشغلت فى اللى معايا فى جيبى افتركت ان بعد الميريت الاصفر والتونكيز وحساب القهوة يفضل فى جيبى 40 جنيه
قلبى اتقبض لما فكرت ان ممكن بكره ميبقاش معايا فلوس اكل وادخن افتركت الشكرة وانى لسه مسيبتش الشغل نهائى كرامتى نأحت عليا اوى
للحظه حسيت ان الوقت بيجرى بسرعه وانى متاخر عن كل الناس اللى بدات معايا اللى اتجوز وخلف
واللى بره وحلف ماهو راجع
راجعت كل اصحابى لقيت انى الوحيد اللى متجوزتش لسه وكمان مافيش رصيد فى البنك ولا حتى بمية جنيه اعصابى بدات تنشد زى وتر العود ودمى بدأ يفور قمت من القهوة ركبت وروحت لقيت البواب بيقولى يا ا فلان
كهربة السلام والاسانسير واجر الحارس اللى هوا هوا يعنى(100 جنيه)بصتله من فوق لتحت وقات فى بالى وانت ذنبك ايه اضربك وانت زى حالاتى
قلتله طيب
ركبت الاسانسير طلعت
فتحت الشقه لقيته قاعد على التلاجه بيهز رجليه وبيضحك

الاوله بسم الله

بعد تقريبا 5 سنين من التفكير ولما بقى سنى 31 سنه قررت ادون
وهادون لانى عايز اغير جو قلت ياواد يا متبهدل تغير جو فين؟
تغير جو فين؟ تروح شرم مثلا؟ تقضى يومين فى اسكندرية؟تزحف زى الهكسوس
على واحد صاحبك مشوفتوش من زمان؟تدورلك على مزة وتتنيل تتورط فيها واهى موته والسلام
وفجاة شيطان الوحده نط من الشاشه على راسى وبخ فى ودنى بالراحه
بدل ماتروح شرم او اسكندرية وانت اصلا مافيش معاك فلوس تغلط او حتى تمرض
او تبرشط على واحد كل ذنبه ان صاحبك فى يوم كان اسود عليه وعليك وترمى عليه بلاك
او تورط نفسك ورطه العمر ووتلبس نفسك فى حيطه مع واحده تركب على قفاك طول العمر
ماتيجى ياواد تدون
تفيت عليه(من شمالى) زى ماعلمتنى امى واتعوذت وقولتله غور بفقرك هيا ناقصاك؟
اقولك اغير جو تقولى دون
قالى بس ماتتعصبش يا معلم واسمعنى للاخر
من غير تف قولتله : ار يابن الكئيبه
قالى انت من زمان كان حلمك تسافر تلف العالم على موتوسيكل ومعاك كاميرا وتلات لغات فى بقك اللى
تستاهل سده ده (زومت عليه) وتشوف الدنيا والناس وتهرب من البؤس اللى هنا ده صح؟
قلتله قصر
قالى اديك اتنيلت قعدت فى المخروبة وممعكش تمن السجاير اللى بتحرقها
ومعندكش شغل وكمان بقيت نفرى وبراوى زى قط البرارى لا حد بيحبك ولا انت طايق حد
حتى المزز اللى عرفتهم كرهوك فى الصنف وكرهتهم صح؟
كلامه بدأ يعجبنى قلتله صح ياعم الفاهم
قالى وهو حاسس انه اتمكن منى(ابن اللئيمه) خلاص يامعلم خش ارمى الكلمتين اللى وجعينك ومضايقينك من الدنيا
كل يوم وشوف يمكن يكون فى حد زى حالاتك يعبر اهلك تقوم انت ترد عليه تبقى فله
واهو ياعم من غير ماتشوفه وش لوش ولا تقعد معاه على قهوه وانت اصلا مبتستحملش بواخة البشر
يمكن ترتاح ولا هاتفضل نكره كالعاده ولا حد يعبرك ويبقى دا بقى بختك فى الدنيا وخلاص
قلتله بكل الغرور اللى مخدتش غيره فى الدنيا
انت عبيط ياعم نكرة مين؟انا ياعم لولا ياعم انى مكبر دماغى لدرجة انى معنتش باقدر اخرجها
من باب الاوده كنت ولعت الدنيا انا بس عايز فترة هدنه مع نفسى
شد عليا لما لقانى بارجع بضهرى وقالى : هدنه مين يا روميل مافيش هدنه مع نفسك بتقعد 5 سنين
دا انت لولا ان انا مزاملك من كان زمانك فكت منك وماشى فى الشارع عامل فيها اشارة مرور
او كنت عملت نفسك مطب على الدائرى ياعم روق هوا انا ماعرفكش؟
داس على الجرح وقالى: انت مش بقالك اسبوعين تلاته بتقرا كل المدونات اللى بتشوفها
وبقالك 3 ايام قاد تبتعت ردود فى كل المدونات وعجبك الموضوع وانشغلت مع الناس
لغايه ما المدونه بتاعت جبهة التهييس قالتلك انك غبى وكلامك غبى فقررت تتمشى افرنجى
ومتنزلش لمستواها
عنيا احمرت من النرفزة وقلتله ايه ياعم مالك انا لو عايز ارد ما انت عارف انا ممكن املا
3 مليون صحفه كل يوم بس انت عارف معادش لينا فيه
قاللى هازئا: صادق يا مولانا خلاص يا سيدى اعملك مدونة ولما حد يشتمك اهو يبقى فى بيتك
وانت اصيل متردش على ضيف واهو برضه تكتب اللى يريحك (ضحك عليا وصحى النعره العربيه الاصيله)
لما صحى الملاك العربى المضياف اللى جوايا اتحمست وعنيا لمعت وافتكرت الخيمه والخيل وعنترة
وامرؤ القيس والمتنبى وهوا واقف فى المعادى عالكورنيش والحصان بياخد دش فى النيل و بيقول
ألخَيْـلُ وَاللّيْـلُ وَالبَيْـداءُ تَعرِفُنـي
وَالسّيفُ وَالرّمحُ والقرْطاسُ وَالقَلَـمُ
انا من نظر الاعمى الى ادبى
واسمعت كلماتى من به صمم
قام خادتنى العزة بالعبط ورفضت اعترف لنفسى انه سخنى وولعت عقب سيجارة قديم
وجبت الجهاز على حجرى وفتحته النت لقط بسرعه فتحت بلوج سبوت والكئيب جنبى
لسه باقول بسم الله الرحمن الرحيم سمعته اهه متكلفه وصوته وهوا بيبعد بيقول (ماكنت كويس)
فرحت من جوايا انه اتأذى رحت بانى مدونه صغيره اتوكلت على الله وخابط التدوينه دى.