كل يوليو والثورة واكلة دماغكم

فى مصر:
انفلونزا الطيور تحقق اعلى معدلات الاصابة خارج اسيا وتتحول لمرض متوطن
انفلونزا خنازير وأول وفاة فى العالم العربى
الطاعون يعود وكاننا فى الجاهلية
الدرن-السل- يعود بمعدلات عالية بعد ان اعلنت الحكومة انه كان تحت السيطرة
التيفويد نتيجة تلوث شبكة المياه
-
قطارات وولعت
مراكب وغرقت
طيارات ووقعت
عربيات وطرق وبيموت مننا كل سنه واحنا بنعدى الدائرى اكتر من اللى ماتوا واحنا بنعدى القناة
جبال وبتقع على اللى ساكنينها
قمح ومليان بلاوى وحالات تسمم بالرصاص والعيش اصلا مش لاقينه
شرطة وافسد من الشيطان نفسه
قضاء ومنيل بستين نيله
ميه وبتجيب تسمم
زراعة وسيبتوا يوسف والى يبوظها
كهرباء وسد عالى واتقطعت عن نص الجمهورية ويزيد شوية ساعات من اسبوع تقريبا
كرامة وبقت تحت الجزمة
اخلاق ومعادش فيه
دين وعليه العوض
ادب وقلة الادب احسن منه
ارض والاسم بتاعتنا وساكنين ايجار

وكمان ليكوا عين تقولوا ان الثورة حررتكم وبتحتفلوا كمان
ربنا يورينى فيكوا سنه صدعتونا بافلاكم واعلامكم واغانيكم ودوشتكم
وكلامكم وسكاتكم ونظراتكم ودفاعكم وهجوكم
ارحمونا بقى
ولو اللى جاى فيه ثورة وغضب وهتبقى زى اللى فات مش عايزين
كدا احسن اهى حتى لما تفك ربانى مش هيفضل من القديم حاجة ونبدا على نضف
ومحدش يبقى ليه فضل على حد
لا جيش ولا لامؤاخذه قرنية
طيب كل يوليو والثورة واكلة دماغكم

13 comments:

بدراوى Friday, July 24, 2009 2:03:00 AM  

عندك حق فى كل كلامك
ثورة ايه ديه
كل الفساد رجع تانى

الكلمة نور Friday, July 24, 2009 2:07:00 AM  

دا كأنه مكتوب على اسمنا
نيلة سودة منيلة بقطران عليهم وعلى عيشتهم
وكمان مش يسكتوا ويعدوها جمايل
لا بيذلونا زى ما يكونوا شفعولنا وخرجونا من جهنم على الجنة

المهندس Friday, July 24, 2009 5:29:00 AM  

استعجب كثيرا ممن يعتبرون النظام الحالي امتداد لثورة يوليو ... طيب بامارة ايه ؟ هو صحيح نظام مازال جمهوريا - حتي الان - ... ولكنه انقلب علي كل مكتسبات .. وسياسات ثورة يوليو ... فلم يعد يحتفظ منها سوي باكلشهات ... باهتة ..منها اصراره علي الاحتفال " المظهري " بعيد الثورة ... وهو الذي فرغها من كل معني ومضمون
عصر الثورة انتهي بوفاة الرئيس / جمال عبد الناصر ... وما حدث من يومها ...وحتي الان ...هو انقلاب علي كل مبادئ الثورة التي تفاعل معها الناس وارتبطوا بها ... فهل يعتقد شخص ان سياسات الخصخصة ... تمت للثورة بصلة ؟ ... وهل سياسات نفض الدولة يدها من التوظيف والتعليم والصحة ...هي من مبادئ الثورة ؟
فارجو ان يتم تقييم الثورة في اطارها الصحيح ... لا ان يتم تحميلها مالا يصح بحال نسبته اليها
شكرا والسلام عليكم

المهندس Friday, July 24, 2009 5:33:00 AM  

الصديق ... الكلمة نور
يستفزني كثيرا وضع رقابة علي التعليقات ... ولا اعرف السبب في ذلك ؟ ... فانت تملك في حال ان قام شخص بتعليق " غير لائق " ان تحذفه .... ولكن سياسة الرقابة السابقة تلك تستفزني ...كما لو كنت لا تثق في زوار المدونة ... وتحب ان تطلع اولا علي ما يكتبونه ... وهل يصح نشره ... ام لا.
انك تذكرني بمنصب الرقيب علي الصحف الذي كان يحذف ويضيف ما يشاء من الصحف قبل التصريح لها بالطباعة

واحد من العمال Friday, July 24, 2009 5:42:00 AM  

فعلاً كل اللى عملته الثوره راح
وبقى عندنا ولى للعهد
والأقطاعى بقى مستثمر
والتعليم لم يعد بالمجان
والعيان وفقير يروح يموت
كل شىء بقى بثمن
ورجع مجتمع الخمسه فى المائه
يعنى عايزين ثوره جديده
محدش عنده ثوره زياده

تحياتى

الكلمة نور Friday, July 24, 2009 3:35:00 PM  

صديقى المهندس
النظام الحالى هو امتداد ثورة يوليو
وامتداد طبيعى كمان
زى رمسيس وغمرة والعباسية ومدينة نصر
هؤلاء هم ابناءها
وارجوك واتوقع منك واتمنى عليك ان تفرق بين جمال عبدالناصر القائد الكاريزماتيك حسن النية والثورة كرجال وافكار ونمط من السلطة اخترعوه وتوارثه رجال الجيش بعدهم
حقيقة لا احمل حقدا على عبدالناصر او السادات حتى لو انهزمنا فى حروب ودمرت مدننا وتورطنا فيما كان يستحق الانتظار ولو حتى قتل الالوف فى معتقلاته وحتى لو تخلى السادات عن دور مصر وفتح ابواب لم تسد من بعده ففى ظنى ان كل هذا كان حتميات تاريخية تفرضها ظروف جدة التجربة وقصر فترة تسلطهم وامتلائها بضغوط الصراع المشتعل وقتها فى كل العالم
رغم كل هذا اقول انهم كانوا بشرا يخطئ ويصيب وجاء مبارك وهو احد افرازات هذه الالية المتسلطة فى اختيار الحاكم التى اوجدتها ثورة يوليو رغم انه ليس من رجالها الاصليين ولكنه اكيد احد منجزاتها شئت هذا ام ابيت
وهذا الرجل بالذات سمحت له كل الظروف ان يكون شخصا اخر ويبنى دولة اخرى
وكان سيصبح وقتها قائدا تاريخيا ولكنه اضاع الفرصة لان الجيش لا ينتج رجالا قادرين على التشاور واعتماد الحرية منهج للتفكير والحكم
هكذا يربونهم فى الجيش هكذا يبنون روؤسهم
وهذه فى نظرى سيئة مساوئ تحكم العسكر فى الحكم
وهذا ما انتجته الثورة باختصار
####################
بالنسبة لموضوع الرقابة على التعليقات
فارجوك تحمل غلاستى وسوف اشرح الامر فى بوست منفرد
:) تحياتى

الكلمة نور Friday, July 24, 2009 3:38:00 PM  

واحد من العمال

الاخ العقيد ملك ملوك الغنم عنده ثورة خضرا معاك شنطة سودا تاخد فيها
:))
والان بعد 57 سنه السؤال الاهم
هل كانت الثورة هى جمال عبدالناصر؟؟؟

المهندس Friday, July 24, 2009 4:02:00 PM  

الديق / الكلمة نور
كلا ...النظام الحالي ..ليس امتدادا لثورة يوليو ... هو نظام جمهوري نعم ... ولكنه لا يعتبر امتدادا لها ... بل هو ذو تجربة خاصة ... ربما يصلح ان يكون عهد الرئيسين انور السادات ومبارك عهدين متكاملين ... اما كون وصفهما انهما امتداد لمبادئ عصر جمال عبد الناصر فتلك مغالطة تاريخية ... وايدلوجية ايضا .
كيف يجتمع الشئ ونقيضه ... ثم نسمي هذا امتدادا ؟ ... ان سياسات اليسار الاشتركي - الذي كان في بعض الاحيان متطرفا - في عهد عبد الناصر ... لا يمكن ان تتكامل او تجتمع مع سياسات اليمين الاقتصادي والايدلوجي - الذي هو متطرفا معظم الوقت - والمطبق حاليا
اما الاخطاء والخطايا ... فانا مقر بها ... سواء في عهد الثورة ... او في العهود اللاحقة ... ولكن لزم التنوية ... ان الثورة ليست مسئولة عن الاوضاع الحالية .
شكرا ... وفي انتظار تفسير سبب تطبيق الرقابة " السابقة " علي التعليقات.... السلام عليكم

أليس في بلاد العجائب Friday, July 24, 2009 8:50:00 PM  

هي مش الثورة دي مرات الثور؟

دي بتاكل برسيم مش دماغ

والبرسيم عند الزراع

والزراع هجروا ارضهم

و الارض بارت

يبقي لا في ثورة ولا ثور

في ارض جرداء عطشانة لحاجة ترويها وترحمها من ضربة الشمس بالنهار و برد الشتا بليل

ممعاكش بق ميه يرويها ولا هنستني عمو جيمي اما يستوردهولنا

الكلمة نور Friday, July 24, 2009 9:13:00 PM  

مولانا المهندس صديقى الدقيق
نعم هما امتداد لنفس طريقة السيطرة والتسلط والاختلاف فى الادوات المستخدمة
فمرة كانت اشتراكية
ومرة رأسمالية
ومرة اخرى رأسمالية فاسدة
ولكنها فى كل الاحوال ديكتاتورية عسكرية متسلطة
واذا كان من اشلع النار ليس مسئولا ن الحريق فمن نسأل؟
المحترقون ام رجال اطفاء نستجدى ظهورهم وهم لازالو فى على الرحمن
؟؟؟؟؟؟؟؟؟؟؟؟؟؟؟!!!!!!!!!!!!!!!

الكلمة نور Friday, July 24, 2009 9:15:00 PM  

معايا مية
انا مستناش من ابوالجيم اى حاجة
لا ارض ولا تور ولا زراع ولا مية
وبارت فعلا واياكش تولع
وعلى الارض السلام وبالناس المسرة

أليس في بلاد العجائب Friday, July 24, 2009 10:00:00 PM  

يا ريت ميتك دي تنفع والله ولا تحوق

ساعات الواحد بيفكر ايه نوع الرية اللي الارض دي محتااجة تترويها علشان يتصلح حالها و يروح منها البوار و ترجع خصبة قابلة لانبات خيراتها

متدوبش حبوب الاخلاق دي في شوية المية دول و تدلقهم عليها .. اهي محاولة احسن من مفيش

لعله خير



بما اني معيشتش وقت الملك بس من اللي بسمعه كده و شايفاه في بيوت الناس القديمة حاجة واحدة مهمة بالنسبالي علي الاقل

الناس كانت نضيفة جوه و برة

حتي الحرامي مكانش زي الشفافين بتوع دلوقتي

الكلمة نور Friday, July 24, 2009 10:44:00 PM  

سيبك انتى هو بس ربنا يؤمر ومحدش هيقف قصدها وتبقى فل
بس ازاى ؟؟

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews