عليا السكات بالتلاته

عليّا السكات بالتلاته
ان ما تخرس لاقطعك
عايزها تفهم من شكل وشى
عليّا العمى بائن ولا رجوع
لو تسرحوا فى عينيها
لاكون مقطع كل صورة ليها
حتى اللى جوا المحفظة
عليّا الصبر
ليكون طريقى طويل
وهى مش حمل مشى
ورجلي يدوب تشيلنى
عليّا الغربة لاكون نافيك
لو تهل وتدق زيادة مرة
عليّا الوجع
والورد بيموت من الوجع
+++++++++++
عليّا اسكت كل مرة
واغمّض عيونى
واكتم فى قلبى لاصوته يعلى
واقفل شفايفى واحبس لسانى
عليا حاجات كتير
ومش مقصر
وبلاش افسر
اصل اخر مرة جيت افسر
قلبى اتهبر ونفسى اتحشر
وعينيا اتبلبلت
وشهقت شهقة وصوتى راح
وصحيت لقيتنى فى قلب عتمة
وواصلنى صوت
يشبه لامى
مش قلتلك حلم الليالى
بعد الغروب اوعى تفسره؟