عندما هاج عرابى على الخديوى

عندما اراد عرابى ان يهيج على الخديو لم يستيقظ فى السادسة صباحا وينزل من مدينة نصر ليقابل اصدقائه الهائجين عند ثكنات الامن المركزى فى الدراسة متخذين طريق الازهر حتى ساحة عابدين المجيدة
بل استيقظ براحته خالص 10 صباحا تقريبا واصطبح فى قهوة "ابو علاء" فى شارع حسن الاكبر بكوب شاى بحليب "منه فيه" وحجرين قص صباحى ثم امتطى حصانه الروسى الاصل"بديل اللادا الحالية"وذهب ليهيج على الخديوى بدماغ موزونة
وافلح مسعاه فقال:"لقد ولدتنا امهاتنا احرار ولن نستعبد بعد اليوم" اى شجاعة هذه؟
انها شجاعة الاصطباحة الجميلة والنوم الهانئ
هذا ماحاولت ان اقنع به صديقى الذهاب فى الصباح الباكر التالى للفجر مباشرة لمساندة اصدقائه المحتجين أمام وزارة العدل
يضحك ويقول: بس أنا مش عرابى.
أقول: طب ايه اللى هيخليك تقلقنى بدرى يا حيوان طالما عارف انك مش عرابى؟
يقول :عشان كان المفروض انام هناك ومقدرتش
أقول: طالما عيل ومبتقدرش بتورط نفسك ليه؟
يقول:هى دى الله يعينك؟
اقول: متزعلش حقك عليا .....الله يعينيك ويرزعك فى الارض
يضحك واضحك
**************************************
ليس للبطولة علاقة بالاستيقاظ المبكر ولكن لها علاقة بالاستيقاظ بوجه عام
هذا ما تحاول ان تقنعنا به اعلانات المنشطات الجنسية المنتشرة بهطل هذه الايام فى المحطات وخصوصا قناة الحياة
اعلان عن فايركتا اللى هيخليك "تفرتك" مصحوبا فى اوقات برجال محترمين يرفعون "كوريك" وبيغنوا اغنية لها علاقة بالرفع واعلان عن شئ اخر هيخليك تقف "وقفة راجل" مع شخص يظهر فى الاعلان وهو يطول ويطول امام زوجته
واعلان من قبلهما عن امراءة متنرفزة وبتكسر فى بيتها وجوزها واقف قدامها زى الاباجورة وبعدين بيجرى ويدخل اودة ويقفل عليه ويبلبع حباية
وبعدين مراته تكسر عليه الباب
فإذا ما نظرت لما دون حزام وسطه-بعد الحباية طبعا- انهارت من الارتياح وخلعت توكة شعرها على طريقة الافلام العربى القديمة
يادى الفضيحة يا جدعان
اسمع من يقول : فضيحة ايه بس بلاش تخلف
دى علاج مش رفاهية
يا راااجل والله ما كنت اعرف
ايه عدم القدرة بقت وباء؟
يعنى عدت الكبد الوبائى والفشل الكلوى ؟
انا متأكد لا طبعا
طب لو افترضنا ان الكل اتضرب وبقت مشكلة عامة مع انى ماظنش -بس هو الكسل الله يحرقه-يبقى لدرجة الكوريك ورجالة بتغنى للرفع
ورجالة بتطول كلها ببعضها أول ما تدخل البيت ؟
++++++++
اذا كان هذا يخرج عن اخلاقيات المجتمع فلماذا يصمت عنه الجميع وكأنه فعل عادى لا يمت للخروج عن المألوف بصلة؟
هل مشاهدة اسرة لاعلان مثل هذا لا يخدش حياء نسائها على الاقل فى جلسات بها شباب او بنات؟
هل يتم اختصار الرجولة فى الفحولة؟
يعنى اذا اتفق رجال الوطن على بلبعة فياجرا فى يوم واحد فسنثور على قصر العروبة؟
والسؤال الاهم
هل هاج عرابى على الخديوى لانه كان ضارب فايركتا ؟

9 comments:

Unknown Thursday, July 30, 2009 4:30:00 AM  

انت شوفت اعلان خلى السلاح صاحى
اللى اتذاع من حوالى 8 شهور
و بعدين شالوه من القنوات
؟!!

حاجة قلة ادب يا راجل

Unknown Thursday, July 30, 2009 4:31:00 AM  

التعليق وصل و لا وقع
؟!!

الكلمة نور Thursday, July 30, 2009 8:46:00 AM  

وصل يا بدراوى
وكمان خلى السلاح صاحى؟!!
يبقى الجاية هوجة عرابى

دا قلة ادب كلمة كلها ذوق
دى حاجة تانية

أميرة Thursday, July 30, 2009 1:08:00 PM  

قال رسول الله صلي الله عليه وسلم :

ان لم تستحي فأفعل ما شئت

الحياء كله خير




الحياء والايمان قرناء جميعا ، فاذا رفع احدهما رفع الأخر
صدق رسول الله صلي الله عليه وسلم


لا ايمان
لا حياء


لا عزاء :-


mbc
كانت من سنتين ابتدت حملة تحت عنوان اقم صلاتك قبل مماتك

نزلت يوم والتاني و اترفعت .. الظاهر منزلتش بواسطة

الناس بتتكلم علي الحق علي استحياء في حين ان قلة الحياء صوتها عالي و بيعلي يوم بعد يوم

بردة

لا عزاء

Anonymous Monday, August 03, 2009 10:13:00 AM  

انت كويس؟

أميرة Tuesday, August 04, 2009 6:43:00 PM  

؟؟

ربنا يجعله خير

الكلمة نور Tuesday, August 04, 2009 11:17:00 PM  

اليس - غير معرف
شكرا لسؤالكم انا جميل الحمدلله
كنت فى خلوة قطعها عدة منغصات ولكن الحمدلله
زى الفل البلدى
شكرا تانى لسؤالكم

أميرة Tuesday, August 04, 2009 11:25:00 PM  

الحمد لله

الواحد مش ناقص قلق

الكلمة نور Wednesday, August 05, 2009 12:32:00 AM  

شكرا يا ست الكل

Powered By Blogger

Popular Posts

عالماشى

لا ترهبوا طرق الهداية أن خلت من عابريها
ولا تأمنوا طرق الفساد و إن تزاحم سالكوها ..
عبد الرحمن الشرقاوى

زوار

Followers

Total Pageviews